Тэма дня – прапаганда працуе для аднаго слухача
«Лукашэнка ўважае дэзынфармацыяй заявы пра ўкраінскі контрнаступ». Гэта не цытата з сатырычнага тэлеграм-каналу. Гэта рэальныя словы крывавага дыктатара.
Абсалютна ўсе палітычныя аналітыкі свету сочаць за падзеямі ва Украіне. Толькі наіўны чалавек можа меркаваць, што мы назіраем унутраную ўкраінскую праблему. Насамрэч перад намі раскрываецца драма скону расейскай імперыі, імперыі зла, як калісьці ў ЗША назвалі Савецкі Саюз.
Сучасная Расея назвала сябе пераемніцай Савецкага Саюзу, і Захад праглынуў такую ідэалагічную пілюлю.
Бальшавікі ўзору 1917 году – гэта сучасная Ісламская Дзяржава. Насамрэч не дзяржава, бо не мае гістарычных межаў. І бальшавікі і ісламская дзяржава – гэта злачынная групоўка.
Калектыўны Захад пабудаваў Савецкі Саюз: тэхнічнай і тэхналагічнай дапамогай у 1930-х гадах. І падчас Другой Сусветнай вайны, натуральна.
Знішчылі нацызм, але не асудзілі сталінізм. Цяпер ловяць пагрозы ядзернай зброяй.
Ва ўсёй названай геапалітыцы ёсць такі фактар як беларусы.
Непрыкметная краіна, дзе не менш за пяць тысяч чалавек сядзяць за кратамі «за палітыку», і не менш за паўмільёна вымушана пакінулі свае дамы.
І ў гэтай краіне ўсё яшчэ жывы дыктатар, які не менш як трыццаці працэнтам грамадзянаў даў «пуцёўку ў жызьнь». У асноўным гэта людзі ў пагонах, у мантыях, а таксама з партфелямі начальнікаў адміністрацый.
«Людзі гасударавы».
І вось гэтым людзям Лукашэнка, які відавочна моцна хворы, бадзёра заяўляе наступнае (цытую паводле дзяржаўнага агенцтва БелТА): “Прэзідэнт Беларусі Аляксандр Лукашэнка ўважае дэзынфармацыяй заявы пра ўкраінскі контрнаступ. Пра гэта ён заявіў на сустрэчы 18 траўня з удзельнікамі паседжання Савету парламенцкай асамблеі АДКБ. … У кожным баі дэзынфармацыя вельмі небяспечная. Узгадайце курскую бітву пад Сталінградам, калі мы паспяхова дэзынфармавалі праціўніка і выйгралі гэтую бітву».
Лукашэнка прымазаўся да падзеяў 1943 году, і разам з тым намякнуў, што расейцы ва Украіне хітруюць, і ўсё ў іх руках.
Перакладзем на чалавечую мову. Лукашэнка кажа сваім падначаленым, што джокер пад назвай «Крэмль» усё яшчэ ў рукаве, усё яшчэ можа згуляць ва ўнутрыбеларускай сітуацыі.
Цяпер уявім, што ўкраінцы выкінуць расейцаў са сваёй тэрыторыі.
Тое, што мы бачым сёння з боку Лукашэнкі, завецца гульнёй ва-банк.
З паразай Расеі ў Лукашэнкі казыроў не застанецца.
Севярын Квяткоўскі, Беларускае Радыё Рацыя
Artykuł Тэма дня – прапаганда працуе для аднаго слухача pochodzi z serwisu БЕЛАРУСКАЕ РАДЫЁ РАЦЫЯ.