Գայանե Հակոբյանը ՁՊՎ-ում հացադուլ է հայտարարել. Ագնեսա Խամոյան
44-օրյա պատերազմում զոհված Ժորա Մարտիրոսյանի մայրը՝ Գայանե Հակոբյանը, որը գտնվում է ՁՊՎ-ում, հացադուլ է հայտարարել։
Լրագրողներին այս մասին ասել է ԱԺ «Հայաստան» խմբակցության պատգամավոր Ագնեսա Խամոյանը։ Նա այսօր այցելել է Գայանե Հակոբյանին․
«Մենք հասցրեցինք քայլել բաց օդում։ Տիկին Գայանեն հացադուլ է հայտարարել»,-ասել է Խամոյանը։
Պատգամավորը մանրամասնել է, որ զոհված զինծառայողի մայրը երեկվանից չի սնվել, հայտարարել է, քանի դեռ գտնվում է ՁՊՎ-ում հրաժարվելու է սնունդ ընդունել․
«Նա սպասում է առերեսմանը։ Իր համար անհասկանալի է, թե ինչու է ուշանում առերեսումը։ Միջադեպի հետ կապված ևս մեկ անգամ վերահստատեց, որևէ առևանգում տեղի չի ունեցել, պարզապես Աշոտին առաջարկել է նստել իր մեքենան զրուցելու, ևս մեկ փաստ, որ չէր կարող տեղի ունենալ առևանգում, մեքենայի դռները չի փակել։ Իր համար շատ անսպասելի Աշոտն իրեն դուրս է նետել մեքենայից»,-պատմել է Խամոյանը։
ՔԿ-ից հայտնել էին, որ առերևույթ իր կամքին հակառակ Աշոտ Փաշինյանին ավտոմեքենայով տեղափոխելու միջոցով առևանգելու հանցանք կատարելու մեջ անմիջականորեն ծագած հիմնավոր կասկածի հիման վրա Ոստիկանության կողմից Գ. Հակոբյանը ձերբակալվել է և ներկայացվել վարույթն իրականացնող մարմնին։