Казакстан менен Кытай визасыз режим тууралуу макулдашууга кол коюшту

Казакстандын президенти Касым-Жомарт Токаевдин Кытайга жасаган мамлекеттик сапарынын алкагында 23 документке кол коюлду. Алардын арасында эки өлкө ортосунда визасыз режим киргизүү тууралуу да макулдашуу бар. Бул тууралуу Токаевдин маалымат кызматы билдирди.


Документке ылайык, казакстандыктар Кытайда, ал эми кытайлыктар Казакстанда чек арадан кирген күндөн тартып 30 күндөн ашпаган мөөнөттө (жалпысынан 180  күндүн ичинде 90 күн) визасыз жүрө алышат. 


Кытайдын лидери Си Цзинпин менен Токаев Сиань шаарында документке кол коюп жатышкан маалда Алматыда визасыз режимге каршылык билдирип чыккан «Атажурт» партиясынын төрагасы Бекзат Максатханулын полиция кармап кетти.


Социалдык тармактарда анын тарапташтары «мунун артында Кытайга жагынуу жатат» деген пикири менен бөлүшүп жатышат.


Былтыр Казакстан кытай жарандары үчүн 14 күндүк визасыз режим киргизген. Ага ылайык, кытай жарандары 180 күндүк мөөнөттө Казакстанда 42 күндөн ашык жүрө албайт. Бул эреже Индиянын жана Ирандын жарандары үчүн да киргизилген.