Գեներալ Գրիգորի Խաչատուրովի կալանքի ժամկետը երկարաձգվել է ևս 3 ամսով
ՀՀ հակակոռուպցիոն դատարանը՝ դատավոր Արամ Գրիգորյանի նախագահությամբ, երրորդ բանակային կորպուսի նախկին հրամանատար, գեներալ-մայոր Գրիգորի Խաչատուրովի կալանքի ժամկետը երկարաձգել է ևս 3 ամսով:
Այս պահին դատարանի բակում են հավաքվել Խաչատուրովի աջակիցները, որոնք իրենց բողոքն են արտահայտում դատարանի որոշման դեմ`վանկարկելով․ «Դատավոր, դավաճան ․․․»։
«Որոշումը կտրամադրվի, տեսնենք՝ ինչ են գրել։ Բոլորս էլ գիտեինք, բոլորիս էլ պարզ էր՝ ոչ մի անակնկալ չկար ասյտեղ։ Ընդամենը մի բան հաստատվեց, որ դատավորի աթոռին նստած անձը, ըստ էության այնպիսի գծեր անցավ, որ այլևս հետ վերադարձ հնարավոր չէ։ Ես չգիտեմ՝ ինքն ինչպես է հետո նիստ անելու։ Այսքանը»,- որոշման հրապարակումից հետո լրագրողներին ասաց Խաչատուրովի փաստաբան Հակոբ Ենոքյանը։
Կորպուսի նախկին հրամանատարը մեղադրվում է Ավշարում նախկինում տեղակայված զորամասի տարածք ձեռք բերելու միջոցով փողերի լվացման համար։ Նա մեղադրանքը չի ընդունում։
Վարույթի շրջանակում մեղադրանք է ներկայացվել ՀՀ պաշտպանության նախկին նախարար, Ազգային ժողովի «Հայաստան» խմբակցության ղեկավար Սեյրան Օհանյանին` ՀՀ քրեական օրենսգրքի 179-րդ հոդվածի 3-րդ մասի 1-ին կետով եւ 3 դրվագ 308-րդ հոդվածի 2-րդ մասով (առանձնապես խոշոր չափերով գույքի վատնում եւ պաշտոնեական լիազորությունների չարաշահում, որն անզգուշությամբ առաջացրել է ծանր հետևանքներ)։
Կառավարությանն առընթեր անշարժ գույքի կադաստրի պետական կոմիտեի նախկին նախագահ Մանուկ Վարդանյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով (պաշտոնեական լիազորությունների չարաշահում, որն անզգուշությամբ առաջացրել է ծանր հետևանքներ),իսկ ՀՀ պաշտպանության նախարարության N զորամասի նախկին հրամանատար Գրիգորի Խաչատուրովին` ՀՀ քրեական օրենսգրքի 190-րդ հոդվածի 3-րդ մասի 1-ին եւ 3-րդ կետերով (փողերի լվացում, որը կատարվել է առանձնապես խոշոր չափերով և պաշտոնեական դիրքն օգտագործելով)։
Մեղադրանք է ներկայացվել «Մոսթոն Ինժիներինգ» ընկերության տնօրեն Դավիթ Գալստյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 1-ին մասով (առանձնապես խոշոր չափերով խարդախություն և փաստաթղթի կեղծում) ու ևս 9 անձի: