ماموندزی: په نوي ډیلي افغان سفارت د طالبانو حکومت ته نه دی سپارل شوی
فرید ماموندزي په یوه ویډیويي پیغام کې چې نن خپور شو ویلي، د سفارت یوه کارکوونکي، قادرشاه هغه مهال چې دی په سفر تللی و هڅه وکړه د طالبانو په استازیتوب د سفارت واګي په لاس کې واخلي، خو د ده په وینا نوموړی بریالی نه شو.
مخکې له دې په قطر کې د طالبانو د سیاسي دفتر مشر سهېل شاهین ازادي راډیو ته ویلي و چې د دوی حکومت قادرشاه په هند کې د افغانستان سفارت ته د نوي شارژدافېر په توګه معرفي کړی.
د هند حکومت تراوسه رسماً په دې اړه څه نه دي ویلي.
په بهر کې د افغانستان ډېری ډيپلوماتیکي استازولۍ لا هم د پرځېدلي جمهوري نظام د ډيپلوماتانو په ولکه کې کې دي، خو ایران، پاکستان، چین، روسیې او د منځنۍ اسیا ځينو هېوادونو دا استازولۍ طالبانو ته سپارلې دي.