په پاکستان کې پراخ اعتراضونه پیل شوي
د خان پلویان پرون په بېلابېلو ښارونو کې لارو او سړکونو ته راووتل او له امنیتي ځواکونو سره لاس ګرېوان شول.
په کراچۍ او لاهور کې پولیسو د معترضانو د تیت پرک کولو لپاره اوښکې بهوونکی ګاز او د اوبو پایپونه وکارول.
معترضانو په راولپنډۍ کې د پوځ قرارګاه کلابنده کړه او په اسلام اباد، پېښور او نورو ښارونو کې یې سړکونه بند کړل.
همدا راز د پاکستان په لویو ښارونو کې مخابراتي خدمات بند دي.
د ډان ورځپاڼې د راپور له مخې د ټیلي کمیونیکېشن ادارې ویلي چې مخابراتي خدمات یې د کورنیو چارو وزارت د لارښوونې په اساس بند کړي دي.
همدا راز د فېسبوک، ټویټر او یوټیوب پر ټولنیزو شبکو هم محدودیت لګېدلی دی.
عمران د فساد د تورونو له کبله پرون د پلازمېنې اسلام اباد د عالي محکمې په انګړ کې د پولیسو له خوا ونیول شو.
عمران خان یوه ورځ وروسته له هغه ونیول شو چې د پاکستان د پوځ یو لوړ رتبه جنرال یې پر ځان د تېر میلادي کال په ناکام برید کې په لاس لرلو تورن کړ.
د پاکستان پوځ دا تور رد کړی دی.