„Менск” прабіўся ў паўфінал чэмпіянату Беларусі па міні-футболе
Спартоўцы ФК „Менск” сталі трэцімі ўдзельнікамі паўфінальнай стадыі чэмпіянату Беларусі па міні-футболе. У паядынку ў адказ 1/4 фіналу менчукі на сваёй пляцоўцы амаль да самай фінальнай сірэны саступалі аршанскаму „Вітэну”, але на апошняй хвіліне асноўнага часу Андрэй Семянюк зрабіў лік роўным – 2:2. У авертайме нікому не ўдалося вызначыцца, а ў серыі пасляматчавых пенальці поспех быў на баку „Менска” – 6:5. Апошні ўдзельнік паўфінальнай стадыі стане вядомы 7 траўня ў Гомелі пасля трэцяга матча паміж мясцовым БЧ і гарадзенскім „УУС-Дынама”. У іх першай гульні ў Гомелі дынамаўцы вырвалі перамогу ў серыі пасляматчавых пенальці, а потым у Гародні гамяльчане ўзялі рэванш – 4:3.
Маладзечна і Жодзіна прымуць першыя сустрэчы 7-га тура футбольнага чэмпіянату Беларусі
Стартавыя сустрэчы 7-га тура пройдуць сёння на футбольным чэмпіянаце Беларусі сярод каманд вышэйшай лігі.
У першым матчы футбалісты „Іслачы” з Менскага раёна прымуць у Маладзечне мазырскую „Славію”. На мінулым тыдні мазыране саступілі на выездзе жодзінскім тарпедаўцам 0:1, а іх сённяшнія апаненты прапускалі тур. Таксама „Тарпеда-БелАЗ” згуляе ў Жодзіне са „Слуцкам”. У 6-м туры футбалісты „Слуцка” перайгралі на сваім полі бабруйскую „Белшыну” 2:1.
Заўтра адбудуцца яшчэ тры матчы: „Дынама” (Берасце) – „Нёман”, „Белшына” – БАТЭ і „Менск” – „Гомель”.
Фіналісты Кубка Беларусі па гандболе вызначацца ў Берасці
Вырашальны этап 27-га розыгрышу Кубка Беларусі па гандболе сярод мужчынскіх каманд сёння пачнецца ў Берасці.
У першым паўфінальным матчы на паркеце берасцейскага спарткомплексу „Вікторыя” цяперашні ўладальнік Кубка мінскі СКА сустрэнецца з гандбалістамі „Гомеля”, а потым гаспадар турніру „Мяшкоў Берасце” будзе супернічаць са сталічным БДУФК-СКА. Заўтра пераможцы паўфінальных сустрэч паспрачаюцца за галоўны трафей, а каманды, якія прайгралі, будуць змагацца за бронзу. Уваход на ўсе гульні „Фіналу чатырох” вольны. У вырашальным паядынку папярэдняга кубкавага розыгрышу мінскі СКА разграміў магілёўскі клуб „Машэка” – 30:20.
Свёнтэк стала суперніцай Сабаленкі ў фінале турніру ў Мадрыдзе
Першая ракетка свету полька Іга Швёнтэк стала суперніцай беларускі Арыны Сабаленкі ў фінале турніру WTA-1000 у Мадрыдзе з прызавым фондам $7,6 млн., паведамляе карэспандэнт БЕЛТА.
У паўфінале польская тэнісістка лёгка перайграла расіянку Вераніку Кудзерметаву, якая займае 13-е месца ў сусветным рэйтынгу, – 6:1, 6:1.
Раней у першым паўфінале другая ракетка свету беларуска Арына Сабаленка выйграла ў грачанкі Марыі Сакары – 6:4, 6:1.
Такім чынам, на другім турніры запар у вырашальным паядынку сустрэнуцца два лідэры сусветнага рэйтынгу. Маючы адбыцца ў суботу матч стане іх восьмым супрацьстаяннем, лепшая беларуская тэнісістка пакуль толькі двойчы перамагала польку.
Беларускае Радыё Рацыя
Artykuł „Менск” прабіўся ў паўфінал чэмпіянату Беларусі па міні-футболе pochodzi z serwisu БЕЛАРУСКАЕ РАДЫЁ РАЦЫЯ.