გიორგი მაისურაძე: "ვინ გამოიწვევს იმ 78 დეპუტატს, რომელმაც შექმნა ეს ბოროტი კანონი"

ილიას სახელმწიფო უნივერსიტეტის პროფესორმა, ფილოსოფოსმა გიორგი მაისურაძემ რუსთაველის გამზირზე მიმდინარე აქციაზე შეკრებილებს სიტყვით მიმართა და თქვა, რომ მოქმედი პარლამენტის პირობებში არ არსებობს იმის გარანტია, რომ ეს დეპუტატები არ შექმნიან უფრო "ბოროტ" კანონებს.


მაისურაძემ გამოსვლა 7 და 8 მარტს გამართულ აქციებში მონაწილეების მიმართ მადლობით დაიწყო და თქვა, რომ მათ საქართველოს აღუდგინეს ღირსება.


"მათი დამსახურებაა "ქართული ოცნების" დღევანდელი განცხადება, რომ გამოიწვევენ თავიანთ მიღებულ კანონს. მე მინდა დავსვა კითხვა - ვინ გამოიწვევს იმ 78 დეპუტატს, რომელმაც შექმნა ეს ბოროტი კანონი. რა გარანტია გვაქვს, რომ ისინი უარეს კანონებს არ შექმნიან. ის 78 დეპუტატი, რომლებმაც ერთი ხელის დაჭერით შეურაცხყოფა მიაყენა ქართველ ხალხს, გათელა საქართველოს კონსტიტუცია და მიაფურთხა საქართველოს ისტორიას, იმ თავგანწირულ ხალხს, ვინც საქართველოს დამოუკიდებლობას, ოკუპაციასთან ბრძოლას თავი შესწირა - ჩვენ უნდა ვიყოთ ის ხალხი, ვინც მათ გამოიწვევენ!" - თქვა გიორგი მაისურაძემ.




საქართველოში, განსაკუთრებით თბილისში, მასობრივი საპროტესტო გამოსვლები მოჰყვა პარლამენტის მიერ "უცხოური გავლენის გამჭვირვალობის" კანონპროექტის პირველი მოსმენით მიღებას. ორი დღის განმავლობაში აქციებზე პოლიციამ 133 ადამიანი დააკავა. 9 მარტს პარლამენტთან მორიგი აქციის დაწყებიდან რამდენიმე საათში შინაგან საქმეთა სამინისტრომ გააკეთა განცხადება, რომ გათავისუფლებულია ადმინისტრაციული წესით დაკავებული ყველა მოქალაქე. 


კანონპროექტი უცხოეთის გავლენის აგენტად დარეგისტრირებას ავალდებულებდა არასამთავრობო ორგანიზაციებს და მედიასაშუალებებს, რომელთა დაფინანსების დიდი ნაწილი (მინიმუმ 20%) უცხოეთიდანაა მიღებული.



პარლამენტმა კანონპროექტი პირველი მოსმენით 7 მარტს დაამტკიცა, საქართველოს საზოგადოების სხვადასხვა სფეროს წარმომადგენლების და ოპოზიციის პროტესტის და მოწოდებების მიუხედავად, უარი ეთქვა "რუსულ კანონზე" და ევროპული პერსპექტივის დასამარებაზე.
"ქართული ოცნების" საპარლამენტო უმრავლესობა პროვოკაციულს უწოდებდა განცხადებებს "რუსული კანონის" და ევროპული ინტეგრაციის მიზანმიმართული შეფერხების შესახებ და საკანონმდებლო ცვლილების ერთადერთ მიზნად ასახელებდა გამჭვირვალობას და საზოგადოების ინფორმირებას.
საზოგადოებრივი პროტესტისა და საერთაშორისო კრიტიკის ფონზე, 9 მარტს „ქართული ოცნების“ საპარლამენტო უმრავლესობამ გადაწყვიტა, გაიწვიოს პირველი მოსმენით უკვე მიღებული კანონპროექტი „უცხოური გავლენის გამჭვირვალობის შესახებ“.