ირაკლი კობახიძე: ჰუმანურობა კიდევ ერთხელ აჩვენა სახელმწიფომ

„ქართული ოცნების" თავმჯდომარე ირაკლი კობახიძე პარტიის ცენტრალურ ოფისში გამართულ ბრიფინგზე გამოეხმაურა ბოლო დღეებში თბილისში გამართული დემონსტრაციების დაშლას. ის აცხადებს, რომ სახელმწიფომ კიდევ ერთხელ აჩვენა ჰუმანურობა და მადლობას უხდის სამართალდამცავ სტრუქტურებს. 


„ჩვენ ვართ აბსოლუტურად განსხვავებული, რაც გამოჩნდა გუშინ და გუშინწინ, როდესაც ჰუმანურობა კიდევ ერთხელ აჩვენა სახელმწიფომ, მათ შორის, სამართალდამცავმა სტრუქტურებმა და მათ, რა თქმა უნდა, განსაკუთრებულ მადლობას ვუხდი მოთმინებისთვის და პროპორციულობის პრინციპის შესაბამისად მოქმედებისთვის", - თქვა ირაკლი კობახიძემ. 


7-9 მარტს „უცხოური გავლენის აგენტების" კანონპროექტის წინააღმდეგ გამართულ დემონსტრაციები საპოლიციო ძალებმა დაშალეს. არასამტავრობო ორგანიზაციების შეფასებით, რუსთაველის გამზირზე მშვიდობიანი მოქალაქეების მისამართით სახელმწიფო საპოლიციო ძალას უკანონოდ და არაპროპორციულად გამოიყენეს. 


„როგორც საჯაროდ გავრცელებული კადრებიდან ჩანს, საშუალებების გამოყენება ხდება წინასწარი გაფრთხილების გარეშე, ამასთან, ცრემლსადენი გაზი და წყლის ჭავლი გამოიყენება ერთმანეთის პარალელურად, რაც ეწინააღმდეგება საერთაშორისო სტანდარტს. ამასთან, ადგილი აქვს ცრემლსადენი გაზისა და წყლის ჭავლის ინტენსიურად, დროში შემჭიდროებულ შუალედებსა და დიდი რაოდენობით გამოყენებას, რასაც, გარდა არაპროპორციული ბუნებისა, აქვს მშვიდობიანი მოქალაქეებისადმი არასათანადო მოპყრობის ტოლფასი ეფექტი", - ვკითხულობთ ახალგაზრდა იურისტთა ასოციაციის 9 მარტის განცხადებაში.


დემონსტრაციის დაშლა წუხელ მთელი ღამის განმავლობაში გაგრძელდა. მოქალაქეები თბილისის სხვადასხვა ქუჩებში პროტესტის გამოხატვას განაგრძობდნენ. მოგვიანებით ისინი რუსთაველის გამზირზე კვლავ შეიკრიბნენ და ბარიკადები მოაწყვეს. სპეცდანიშნულების რაზმმა, სპეცტექნიკის დახმარებით, აქცია კვლავ დაშალა, რის შემდეგაც დემონსტრანტები გზადაგზა აწყობდნენ ბარიკადებს, თუმცა მათი მასობრივად დაკავების შემდეგ, საპოლიციო ძალებმა რუსთაველის გამზირი და კოსტავას ქუჩა მომიტინგეებისგან გათავისუფლეს.


რამდენიმე საათში „ქართულმა ოცნებამ" გაავრცელა განცხადება, რომ ისინი გაიწვევენ „უცხოური გავლენის აგენტების" შესახებ კანონპროექტს.






დღეს, 9 მარტს, 19:00 საათზე რუსთაველის გამზირზე, პარლამენტის წინ, კვლავ გაიმართება აქცია.


„ჩვენ ვართ ადამიანები, რომლებიც მოვითხოვთ ორი პუნქტის შესრულებას - გვჭირდება მკაფიოობა, როგორ აპირებენ გაიწვიონ მოცემული კანონი, იმიტომ რომ მათი განცხადებები არის ბუნდოვანი. მათ აქვთ სახელი გატეხილი და მეორე, ის ადამიანები, რომლებიც ჩვენ გვერდით იდგნენ, არიან დაჭერილები", - განაცხადა ბრიფინგზე „გირჩი - მეტი თავისუფლების" წევრმა ცოტნე კობერიძემ.