امریکا په افغانستان کې د ۷ میلیارده او دوه سوه میلیون ډالرو په ارزښت وسلې پرې ایښي
له هغه راپور سره سم، چې په فبرورۍ کې د افغانستان د بیارغونې لپاره د امریکا د ځانګړي سرمفتش دفتر خپور کړ، د امریکا دفاع وزارت د تېر کال په مارچ کې کانګرس ته ویلي و چې متحدو ایالتونو په افغانستان کې د ۷ میلیارده او ۲۰۰ میلیون ډالرو الوتکې، ماشینګڼې، پوځي ګاډي، مهمات، د شپې د عینکو په شان وسایل او د بایومیټریک الې پرې ایښي دي.
په دې راپور کې، چې سرلیک یې دی: "ولې د افغانستان امنیتي ځواکونه وپرځېدل" راغلي چې په افغانستان کې د ۷۸ پاتې شویو الوتکو ارزښت ۹۲۳ میلیونه او ۳۰۰ زره ډالره دی.
په دې راپور کې ویل شوي چې امریکا تر ۴۰ زره ډیر نقلیه وسایط او تر ۳ لکه ډېرې وسلې پرې ایښي دي.