საქართველოს სამთო გამყოლთა ასოციაცია: #არარუსულკანონს
0
საქართველოს სამთო გამყოლთა ასოციაცია 1991 წლიდან დაუღალავად შრომობს საქართველოში ევროპული სამთო-საგამყოლო ტრადიციების და კულტურის ასაღორძინებლად. იმ ტრადიციების, რომლებმაც შექმნა, მსოფლიო აღიარება და წარმატება მოუტანა ფრანგ, შვეიცარიელ, ავსტრიელ, იტალიელ, გერმანელ, ბრიტანელ თუ სხვა სამთო გამყოლებს. იმ ტრადიციების და კულტურის, რომელთაც იგივე აღიარება შეუძლიათ მოუტანონ სვანეთის, ხევის, მთიულეთის და საქართველოს სხვა მთიანი რეგიონების გამორჩეული ნიჭის და პოტენციალის მქონე ახალგაზრდებს,
30 წელი ამ მისიის შესრულებაში საქართველოს განუწყვეტლად ეხმარებოდა შვეიცარია, გერმანია, ამერიკა, ევროკავშირი – სხვადასხვა დონორული ორგანიზაციების და პროექტების გზით.
რომ არ ყოფილიყო ეს დახმარება, დღეს არ იარსებებდა საქართველოს სამთო გამყოლთა ასოციაცია, არ იარსებებდა სათავგადასავლო ტურიზმის სკოლა, არ იარსებებდა აღორძიენებული სამთო გამყოლობის პროფესიის მემკვიდრეობითობა საქართველოს მთიან რეგიონებში. საქართველო ვერ გახდებოდა სამთო გამყოლთა ასოციაციების საერთაშორისო ფედერაციის (IFMGA) სრულუფლებიანი წევრი, ქართველი სამთო გამყოლები ვერ მოიპოვებდნენ საერთაშორისო აღიარებას და “ქართველი სამთო გამყოლი” ვერ გახდებოდა ის “ბრენდი”, რომელსაც დღეს უკვე პატივს სცემს და აღიარებს საერთაშორისო სათავგადსავლო ტურიზმის თანამეგობრობა
ახლაც, სამთო გამყოლთა ასოციაცია, დონორების მიერ არასამთავრობო სექტორისთივს გამოცხადებული გრანტების წყალობით ახორციელებს ისტორიული მნიშვნელობის პროექტებს, რომელთა მიზანია საქართველოს მთიანი რეგიონების სათავგადასავლო ტურიზმის ინფრასტრუქტურის განვითარება, ახალგაზრდა თაობისთვის მაღალნაზღაურებადი, საინტერესო, ჯანსაღი, მიმზიდველი პროფესიების შესწავლა და ღირსეული, თავისუფალი მომავლის შექმნა.
მთამსვლელობა, ლაშქრობა, სამთო თხილამურები, ჯომარდი, ცხენოსნობა, სპელეოლოგია – ერთი სიტყვით, თავგადასავალის ძიება ხმელეთზე, ჰაერში თუ წყალზე თავისთავად თავისუფალი არჩევანია. ჩვენ, სათავგაასავლო ტურიზმის გამყოლები ასეთი თავისუფალი არჩევანით მოვედით ჩვენ პროფესიებამდე და როგორც პროფესიონალები ასეთ ადამიანებს ვემსახურებით. ამიტომ,
ჩვენთვის მიუღებელია კანონი „უცხოელი აგენტების რეგისტრაციის შესახებ“. ის დააკანონებს ხელისუფლების მუდმივ კონტროლის საზოგადოებაზე, თავისუფალ სიტყვაზე და აზრზე. მისი ამოქმედებით ხელისუფლება თანდათანობით და თანმიმდევრულად სრულიად დაიქვემდებარებს ქვეყანაში 30 წლის განმავლობაში გულმოდგინედ ნაშენებ არასამთავრობო სექტორს და როგორც ეს გასაბჭოებამ უკვე გააკეთა ერთხელ, კვლავ მოკვეთს საქართველოს ევროპულ ტრადიციებს და კულტურას.