Фото: The New York Times Афғонистонда «Толибон» ҳаракати аёлларнинг спорт заллари ва боғларга боришини тақиқлаб қўйган, бу эса халқаро ҳамжамиятнинг қораланишига сабаб бўлмоқда. Аммо мамлакат бўйлаб аёллар қоидаларни четлаб ўтиб, мактаблардан тортиб гўзаллик салони ва спорт залларигача яширин бизнес очмоқда. Кобул ва бошқа бир қанча йирик шаҳарлардаги хусусий уйларнинг ертўлаларида аёллар учун спорт заллари ташкил этилган. Деразалар қорайтирилган, мусиқа эшитилмайди, меҳмонлар фақат орқа эшикдан кириши мумкин. «Бу спорт залларини аёллар бошқаради, уларнинг баъзилари ‘Толибон’ ҳокимият тепасига келганидан кейин ишсиз қолган», дейилади хабарда. «Аёллар энди ресторан, маданий тадбир, ҳаттоки боғда ёлғиз юра олмайди, шу боис ер остидаги бу спорт заллари биз учун умид чироғидир», — дейди фитнес ўқитувчиси Лайло Аҳмад. Аҳмаднинг мижозлари орасида БМТнинг собиқ ходимлари, давлат хизматчилари, ўқитувчи, полициячи, журналист ва тадбиркор аёллар бор. «Бу уларни ўтмиши билан боғлаб, ўзларини тирик ҳис қилиши мумкин бўлган ягона жойдир. Спорт залига келиш терапияга ўхшайди. Гарчи биз мусиқани ёқа олмасак-да, барибир рақсга тушамиз, лекин ҳозир қулоқчин ишлатамиз», — дея қўшимча қилди у. Қайд этилишича, аёллар спорт залига боришни оилаларидан яширади, чунки улар мамлакатдаги даҳшатли иқтисодий инқироз шароитида буни пулни беҳуда сарфлаш деб билади. Баъзилар эса аёллар спорт зали, спорт кийими ва эстрада мусиқасини «ахлоқсиз Ғарб импорти» деб ҳисоблайди. «Толибон» аёлларнинг университет ва ўрта мактабда таълим олишини тақиқлади. Афғонистонда аёлларнинг шифохонага ёлғиз бориши ҳам мумкин эмас. Бундан ташқари аёлларга SIM карта сотиб олиш тақиқланган.
