იენს სტოლტენბერგი: დონეცკი, ლუგანსკი, ზაპოროჟიე, ხერსონი, ყირიმი უკრაინაა
მიწის მიტაცება არალეგალური და არალეგიტიმურია. ეს მიწები უკრაინაა. დონეცკი, ლუგანსკი, ზაპოროჟიე, ხერსონი, ყირიმი უკრაინაა, – ამის შესახებ ნატო-ს გენერალურმა მდივანმა იენს სტოლტენბერგმა პრესკონფერენციაზე განაცხადა, რითაც რუსეთის მიერ უკრაინის 4 რეგიონის ანექსიას გამოეხმაურა.
იენს სტოლტენბერგის განცხადებით, უკანონო ანექსია არაფერს ცვლის.
„კონფლიქტის ხასიათს არ ცვლის. ჩვენს დახმარებას არ ცვლის. ნატო კონფლიქტის მხარე არაა, თუმცა მხარდაჭერას ვაწვდით. პუტინმა მობილიზაცია მოახდინა, არის ატომური შანტაჟი, ანექსია, ყველაზე სერიოზული ესკალაცია ომის დაწყებიდან. თუ რუსეთი შეწყვეტს ომს – მშვიდობა იქნება, თუ უკრაინა შეწყვეტს ბრძოლას – ის აღარ იარსებებს, როგორც სუვერენული სახელმწიფო.
ყველა დემოკრატიას ევროპაში აქვს უფლება განაცხადი შეიტანოს, ნატო-ს კარი ღია რჩება. მხარს ვუჭერთ უკრაინის უფლება აირჩიოს საკუთარი გზა და უსაფრთხოების სტრუქტურები. ჩვენი მთავარი ფოკუსი ახლა უკრაინისთვის სწრაფი დახმარების მიწოდებაა.
გვყავს აგრესორი – რუსეთი და უკრაინა – მსხვერპლი. ომის ხასიათი არ შეცვლილა, მაგრამ ეს ყველაზე მნიშვნელოვანი ესკალაციაა 24 თებერვლიდან. ჩვენ გავაგრძელებთ მხარდაჭერას – ეს უკრაინის ინტერესებშია და ჩვენს ინტერესებშიცაა, რომ პუტინმა მიზანს არ მიაღწიოს, ვინაიდან ავტორიტარული ძალები ირწმუნებენ, რომ ასე შეუძლიათ საკუთარი მიზნების მიღწევა.
უკრაინას აქვს უფლება დაიბრუნოს საკუთარი ტერიტორია, რომელიც ოკუპირებულია. უკანონო ანექსია არაფერს ცვლის, ამ კონფლიქტის ხასიათს არ ცვლის. ნატო ყურადღებითაა, ვაკვირდებით რუსეთი რას აკეთებს. პუტინს უნდა ესმოდეს, რომ ატომური ომის მოგება შეუძლებელია და ნათლად გავაგებინეთ ეს”, – განაცხადა სტოლტენბერგმა.