Вадзім Мажэйка: Ёсць вялікія сумневы, што Расея надта зацікаўленая ва ўдзеле войск Беларусі

На фоне сустрэчы Аляксандра Лукашэнкі і Уладзіміра Пуціна ў Сочы – дыскусія пра непасрэдны ўдзел беларускага боку ў расейска-украінскай вайне абвастрылася. Гучаць таксама здагадкі пра мабілізацыю ў Беларусі ды праверкі баявой гатоўнасці асобных падраздзяленняў. Наратыў пра тое, што Пуцін цісне на Лукашэнку, каб той уступіў у вайну, а ён адкручваецца – не да канца праўда, кажа палітычны аналітык Вадзім Мажэйка.

Больш за тое, небяспечны прапагандысцкі наратыў, які стварае карціну, што не адпавядае рэчаіснасці, працягвае аналітык:

-Быццам бы вось паміж вайной і Беларуссю стаіць толькі Лукашэнка. І проста сваімі грудзьмі стрымлівае Беларусь ад падзення. Таму мы мусім дзякаваць яму за абарону таго, што мы яшчэ не ў вайне. Але гэта ўсё няпраўда. Ёсць вялікія сумневы, што Расея надта зацікаўленая ва ўдзеле беларускага войска. І ёсць вялікія сумневы, што Расею стрымлівае больш менавіта пазіцыя Лукашэнкі, а не, напрыклад, той факт, што вайна не папулярная ў беларускім грамадстве.

Памылка думаць, што гэта толькі заслуга Лукашэнкі, трэба ўзважыць і аналізаваць іншыя фактары. Іх пералічвае палітычны аналітык Вадзім Мажэйка, які таксама спасылаецца на расейскую мабілізацыю, што сведчыць пра паразу Расеі ў ходзе вайныЕ

-Ва ўсёй гэтай сітуацыі я не думаю, што Беларусь будзе мабілізоўвацца ці ўступаць у вайну. Хутчэй расейская мабілізацыя наадварот – гэта яшчэ адзін аргумент, чаму ў вайну ўступаць не трэба, бо яна дэманструе расейскую слабасць, што без мабілізацыі Расея не можа перамагчы.

Сам Аляксандр Лукашэнка прасоўвае іншы наратыў, нібы Беларусь робіць усё, «каб спыніць кровапраліцце» ва Украіне, і «ні для каго мы не былі крыніцай пагрозы». Пра гэта ён заявіў сёння, прымаючы даверчыя граматы паслоў замежных краін. Кіроўная наменклатура Беларусі імкнецца не прыгадваць той факт, што Беларусь прадстаўляе сваю тэрыторыю для расейскіх войскаў, на чым настойвае Украіна, а міжнародная супольнасць прызнала Беларусь краінай-суагрэсарам.

Беларускае Радыё Рацыя

Artykuł Вадзім Мажэйка: Ёсць вялікія сумневы, што Расея надта зацікаўленая ва ўдзеле войск Беларусі pochodzi z serwisu БЕЛАРУСКАЕ РАДЫЁ РАЦЫЯ.