Putin Ukrayınanıñ yañı topraqlarını ilhaq ettirecek buyruqlarnı imzaladı

Rusiye prezidenti Vladimir Putin Ukrayınanıñ Herson ve Zaporijjâ vilâyetleriniñ sahte mustaqilligi ve suverenitetini tanığanına dair fermanlarnı imzaladı. Bu Ukrayına regionlarınıñ büyük qısmı Rusiye ordusı tarafından işğal etildi.


Bugün, beklengeni kibi, Putin olarnıñ ilhaqına dair vesiqalarnı imzalaycaq – Rusiyege qabul etüv. Olarnı Rusiye qanunlarına köre mustaqil devlet olaraq tanuv bu yolda kerek olğan bir taqım, Qırım işğalinde de böyle oldı.


Ukrayına, Ğarp memleketleri ve bir çoq diger memleket ilhaqnı tanımaycaq ve Herson ve Zaporijjâ vilâyetini, Donetsk ve Lugansk vilâyeti olğanı kibi, Ukrayınanıñ toprağı dep sayacaqlar.




Putin çıqarğan buyruqlarında «halqara uquq temellerine» ve sentâbrniñ 23-27-nde işğal etilgen Ukrayına topraqlarında keçirilgen sahte referendumlarnıñ neticelerine esaslana.


Ukrayına ve bir çoq memleket bu rey berüvlerni sahte ve qanunsız dep adlandırıp, çünki olar işğal ve cenk uruşları şaraitlerinde milliy qanunlarğa ve halqara uquqqa zıt bir şekilde keçirildi.


Sentâbrniñ 30-nda Kremlde Putin Rusiye deputatları ve Federatsiya Şurasınıñ azaları ögünde çıqışta bulunacaq. Soñra Ukrayına regionlarınıñ ilhaqına dair sahte añlaşmalar imzalanacaq. İlhaq esnası kelecek afta bitecektir. Ukrayına öz topraqlarını azat etme kiçün küreşecek, Rusiye akimiyeti olarnı Rusiyeniñ bir qısmı dep saysa da, bir şey deñişmeycek.


Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.