რა იწერება რუსულ წყაროებში უკრაინული არმიის მიერ ლიმანის ალყის შესახებ
რუსი სამხედრო ჟურნალისტები და ტელეგრამის პრორუსული არხები, რომლებიც სეპარატისტული ძალების და უკრაინის აღმოსავლეთში საოკუპაციო ხელისუფლების ინფორმაციას გადასცემენ, იტყობინებიან უკრაინული არმიის მიერ ლიმანის ალყის შესახებ. დონეცკის ოლქის ეს ქალაქი სეპარატისტული ძალების კონტროლს 2022 წლის მაისიდან ექვემდებარება.
ვრცელდება ინფორმაცია რუსული ჯარების გაყვანის შესახებ შემდეგი ქალაქებიდან: იამპოლიდან, სტავოკიდან, დრობიშევოდან. ქალაქისკენ მიმავალი ერთადერთი გზა, რომელზედაც რუს სამხედროებს ჯერ კიდევ შეუძლიათ მოძრაობა, ტორსკოე-დრობიშევოზე გადის და ცეცხლის ქვეშაა. იქ უკრაინული მზვერავი და დივერსიული ჯგუფები მუშაობენ, წერს თავის ტელეგრამის არხზე „კომსომოლსკაია პრავდას“ კორესპონდენტი ალექსანდ კოცი.
პრორუსული არხი “Архангел спецназа“ (სპეცრაზმის მთავარანგელოზი) ხელმომწერის კომენტარს ავრცელებს, ქალაქში არსებულ რუსულ სამხედრო ძალებში ქაოსის და კავშირგაბმულობის არარსებობის შესახებ. სამხედრო ჟურნალისტი სემიონ პერორი ირწმუნება, რომ გასული ღამე ქალაქის დაცვისთვის „გადამწყვეტი“ უნდა ყოფილიყო.
პრორუსული წყარო ირწმუნება, რომ შესაძლოა, ქალაქი სულ მალე აიღონ უკრაინულმა ძალებმა, იქ განლაგებული სამხედროები კი დაატყვეონ. მათი ზუსტი რაოდენობაც უცნობია.
უკრაინის გენშტაბის თანახმად 29 სექტემბერს რაიონში მობილიზებული ჯარისკაცებისგან შემდგარი, ცუდად გაწვრთნილი ნაწილები გადაისროლეს (სავარაუდოდ, საუბარია სეპარატისტების მიერ კონტროლირებად დონეცკის რეგიონში მობილიზებაზე).
ლიმანი მნიშვნელოვანი სარკინიგზო კვანძია, გარდა იმისა, რომ მისი აღების შემთხვევაში უკრაინა შეძლებს ლუგანსკის რეგიონის დასავლეთით, ლისიჩანსკისა და სევეროდონეცის მიმართულებით შეტევას. კიევი კონტრშეტევის მიმდინარეობაზე კომენტარს არ აკეთებს.
კრემლმა გამოაცხადა, რომ გამართავს დოკუმენტების ხელმოწერის ცერემონიას “რუსეთში ახალი ტერიტორიების გაწევრიანების” საკითხზე. ცერემონია, რომელშიც მონაწილეობას მიიღებენ რუსეთის პრეზიდენტი ვლადიმირ პუტინი და ლუგანსკის, დონეცკის, ხერსონისა და ზაპოროჟიეს მოსკოვის მიერ დანიშნული ლიდერები, 30 სექტემბერს კრემლში გაიმართება.
უკრაინის ხერსონისა და ზაპოროჟიეს რეგიონების დამოუკიდებლობა პუტინმა განკარგულებებით აღიარა 30 სექტემბერს, გამთენიისას, რაც არის შუალედური ნაბიჯი იმისთვის, რათა რუსეთმა უკრაინის ამ ორი ოკუპირებული ტერიტორიის ანექსირება მოახდინოს.
ეს განკარგულებები მსგავსია ნაბიჯებისა, რომლებიც პუტინმა გადადგა ლუგანსკთან და დონეცკთან მიმართებით თებერვალში, უკრაინაში ფართომასშტაბიანი სამხედრო შეჭრის წინ.