პუტინმა ხელი მოაწერა დამოუკიდებლობის განკარგულებებს, რაც წინ უსწრებს უკრაინის ტერიტორიათა ანექსირებას
უკრაინის ხერსონისა და ზაპოროჟიეს რეგიონების დამოუკიდებლობა პუტინმა განკარგულებებით აღიარა 30 სექტემბერს, გამთენიისას, რაც წარმოადგენს შუალედურ ნაბიჯს საიმისოდ, რომ რუსეთმა უკრაინის ამ ორი ოკუპირებული ტერიტორიის ანექსირება მოახდინოს.
ეს განკარგულებები მსგავსია ნაბიჯებისა, რომლებიც პუტინმა გადადგა ლუგანსკთან და დონეცკთან მიმართებით თებერვალში, უკრაინაში ფართომასშტაბიანი სამხედრო შეჭრის წინ.
29 სექტემბერს აშშ-მა და გაერომ მკაცრად დაგმეს რუსეთის გეგმა 30 სექტემბერს გამართოს ანექსირების ცერემონია, უკრაინის ოთხ რეგიონში ჩატარებული რეფერენდუმების შემდეგ, რომლებსაც დასავლეთის ქვეყნები ყალბად მიჩნევენ, მაგრამ რეგიონში მოსკოვის მიერ დანიშნული ოფიციალური პირები აცხადებენ, რომ მოსახლეობა დიდი უმრავლესობით მიემხრო რუსეთთან გაერთიანებას.
აშშ-ის სახელმწიფო მდივნის, ენტონი ბლინკენის თქმით, აშშ "არც ახლა და არც არასდროს აღიარებს ამ ყალბი რეფერენდუმების ლეგიტიმურობას თუ შედეგებს", ხოლო გაეროს გენერალური მდივანი, ანტონიუ გუტერეში ამბობს, რომ ანექსირება იქნება "სახიფათო ესკალაცია", რომელიც ძირს გამოუთხრის სამშვიდობო პერსპექტივას.
რეფერენდუმები იყო "აზრს მოკლებული მცდელობა შეინიღბოს ის, რაც უტოლდება უკრაინისთვის მიწის წართმევის მორიგ მცდელობას" - ამბობს ბლინკენი თავის განცხადებაში.
გუტერეშის თქმით, ნებისმიერ გადაწყვეტილებას წინ წავიდეს უკრაინის დონეცკის, ლუგანსკის, ხერსონის და ზაპოროჟიეს რეგიონების ანექსირება "არანაირი კანონიერი ფასი არ ექნება, და უნდა დაგმობილ იქნეს".
მანამდე კრემლმა გამოაცხადა, რომ გამართავს დოკუმენტების ხელმოწერის ცერემონიას "რუსეთში ახალი ტერიტორიების გაწევრიანების" საკითხზე. ცერემონია, რომელშიც მონაწილეობას მიიღებენ რუსეთის პრეზიდენტი, ვლადიმირ პუტინი და ლუგანსკის, დონეცკის, ხერსონისა და ზაპოროჟიეს მოსკოვის მიერ დანიშნული ლიდერები, 30 სექტემბერს კრემლში გაიმართება.