კახა კალაძე: კარლ ჰარცელისთვის შეურაცხყოფა არავის მიუყენებია
კარლ ჰარცელისთვის შეურაცხყოფა არავის მიუყენებია – ადამიანებმა თავიანთი მოსაზრება გამოთქვეს, – ამის შესახებ “ქართული ოცნების” გენერალურმა მდივანმა, თბილისის მერმა, კახა კალაძემ ჟურნალისტებთან საუბრისას განაცხადა.
კალაძე საქართველოში ამერიკის შეერთებული შტატების ელჩის, კელი დეგნანის იმ განცხადებას გამოეხმაურა, სადაც ამბობს, რომ ის საქართველოში ევროკავშირის ელჩის, კარლ ჰარცელის მისამართით გაკეთებულ კრიტიკულ განცხადებებზე შეშფოთებულია.
თბილისის მერის თქმით, მან არ იცის კელი დეგნანი კრიტიკულ განცხადებებში რას გულისხმობს.
“არ ვიცი, ვერ გეტყვით რას გულისხმობს კრიტიკაში. შეურაცხყოფა არავის მიუყენებია, მე როგორც ვიცი. ადამიანებმა გამოთქვეს თავიანთი მოსაზრება. მთავარია, ეს ყველაფერი იყოს ზრდილობის ფარგლებში. ნებისმიერ ადამიანს ნებისმიერ ადამიანზე აქვს თავისი მოსაზრების გამოხატვის შესაძლებლობა”, – განაცხადა კახა კალაძემ.
მან ასევე, აშშ-ს სახელმწიფო დეპარტამენტის პრეს-სპიკერის, ნედ პრაისის განცხადებასთან დაკავშირებით ისაუბრა, სადაც თქვა, რომ კონკრეტული მაღალჩინოსნები საქართველოს ევროინტეგრაციაში ხელს უშლიან.
კახა კალაძის თქმით, მაღალჩინოსნებში ნედ პრაისმა ალბათ, ის ევროპარლამენტარები იგულისხმა, რომლებიც საქართველოს “მეგობრებად მოევლინნენ“.
“ალბათ, ის ევროპარლამენტარები იგულისხმა, რომლებიც საქართველოს მეგობრებად მოგვევლინებიან და ბოლო დღეების, ბოლო თვეების განმავლობაში საოცარ განცხადებებს აკეთებენ”, – განაცხადა კალაძემ.
შეგახსენებთ, აშშ-ის სახელმწიფო დეპარტამენტის პრეს-სპიკერმა ნედ პრაისმა გუშინ ბრიფინგი საქართველოზე საუბრით გახსნა. მისი თქმით, დეზინფორმაცია და პერსონალური თავდასხმები აშშ-ის ელჩ კელი დეგნანზე და მის გუნდზე არ შეესაბამება პარტნიორებს შორის არსებულ კომუნიკაციას. მისივე განცხადებით, აშშ მხარს უჭერს ქართველი ხალხის ევროპულ მისწრაფებებს, თუმცა, ზოგიერთი ქართველი ოფიციალური პირის რიტორიკა მოსახლეობის ამ მიზნიდან ყურადღების გადატანას ემსახურება.