Белсенділердің БҰҰ-ға петициясы: "Имиджге қыруар қаржы жұмсап, мүгедектерді мүлде ұмытты"
Жиналғандар Қазақстанның мүгедектер құқығын қорғау жөнінде халықаралық келісімдерді мақұлдап, ішкі заңдар қабылдағанмен іс жүзінде елде мүгедектер құқығы сақталмай жатқандығын атап өтті.
"Қазақстанның мемлекеттік органдары қолда бар ресурстарды тиімсіз пайдаланады: қыруар қаржыны әртүрлі имидждік іс-шараларға жұмсап, ал мүгедек адамдардың әлеуметтік құқықтарын шешуге бұл ретте аз сома бөлінеді, сол себепті мемлекеттік әлеуметтік жәрдемақылар тиісі өмір сүру жағдайларын қамтамасыз етпейді" делінген петицияда.
Олардың пікірінше, Қазақстан билігі "халықаралық ұйымдарды мүгедек адамдардың шынайы хал-ахуалынан хабардар етпейді, шындықты бұрмалайды". Мемлекет мүгедектерді баспанамен жеткілікті дәрежеде қамтамасыз етпейді, көпшілігінің баспанасы жоқ. Олар хатта мүгедек адамдарды әлеуметтік қорғау туралы жаңа заң қабылдау мен мүгедек адамдардың құқықтары жөніндегі Омбудсмен институтын ұйымдастыру қажеттігін атап көрсеткен.
Петицияға 17 адам қол қойған.
– Мемлекет мүгедектер жайлы ұмытты. Олар әлеуметтік жағынан қамсыздандырылмаған. Біз мемлекет қолдауын сезініп отырған жоқпыз. Баспана жоқ. Шынымен де өмір сүруге жететіндей жәрдемақы төленбейді. Қазір Қазақстанда мүгедектер 35 мың теңгеге әрең күнін көріп жатыр. Біреудікі 48 мың теңге шығар. Бірақ бұл өте аз. Барлығының жалақыларын көбейтіп жатыр. Экономистер, дәрігерлер. Олар сау адам. Тіпті полицейлер мен әскери қызметкерлерге баспана үшін төлем төлейді. Ал мүгедектерге не үшін сондай жағдай жасамайды? – дейді "Мұра" (Наследие) қоғамдық бірлестігінің жетекшісі Маржан Абдуллина.
БҰҰ өкілдігінен Олег есімді қауіпсіздік қызметінің қызметкері шығып, белсенділерден хатты қабылдап алды. Қабылдағаны жөнінде мөр басып беріп, қажетті байланыс телефондарын қалдырды. Оқиға орнына мемлекеттік органдардан ешкім келмеді.
Нұр-Сұлтан қаласында бұған дейін де мүгедектігі бар азаматтар әлеуметтік жағдайдың нашарлығына шағымданып, наразылық өткізген.
Қарай отырыңыз: "35 мың теңгеге өмір сүріп жүрміз, жұмыс істей алмаймын". Мүгедек адамдар үкіметке наразы (28 мамыр 2021 жыл).
2015 жылы Қазақстан БҰҰ-ның мүгедектер құқығы жөніндегі Конвенциясын ратификациялап, мүмкіндігі шектеулі азаматтарға қатысты көп міндеттемені мойнына алған. Бірақ кейбір мамандар осы уақыт аралығында мүгедектер жағдайына байланысты айтарлықтай өзгеріс көрмегенін айтады.