د مخابراتو او معلوماتي ټکنالوژۍ وزارت: ۵۱ پایې تخریب شوي

د مخابراتو او معلوماتي ټکنالوژۍ وزارت وايي، د روان لمریز کال په لومړیو درېیو میاشتو کې د مخابراتي شبکو ۵۱ پایې په بشپړ یا نسبي ډول تخریب شوي دي.


په دغه وزارت کې د مخابراتي خدماتو د تنظیم ادارې ویاند، سعید شینواري پرون سې شنبه (د غبرګولي ۲۵مه) ازادي راډیو ته وویل: "د روان مالي کال په لومړۍ ربع کې د ټول هېواد په سطحه، د جګړو، ناامنیو او امنیتي تهدیدونو له امله ۵۱ مخابراتي ټاورونه په بشپړ  یا نسبي ډول تخریب شوي دي. په دې کې هغه سایټونه هم راځي چې د اترا ادارې په مالي لګښت جوړ شوي دي."


اترا وايي، تېر لمریز کال ۳۰۸ مخابراتي ټاورونه په بشپړ یا نسبي ډول له منځه وړل شوي او دغه سکټور ته یې تر ۱۷ میلیون ډالرو پورې زیان اړولی دی.