Վանաձորի զինվորական պանթեոնի տարածքը մեծացել է
19-ամյա Նվեր Չոբանյանը Շուշին պաշտպանելիս է զոհվել։
«Ոչ մի ծնողի չեմ ցանկանա էս ցավը», - որդու շիրմի խոնարհած ասում էր նրա մայրը։
Հետախուզության վաշտի հրամանատար, ավագ լեյտենանտ Տիգրան Գոգինյանի հայրը ծաղիկներ էր բերել 30-ամյա որդու գերեզմանին։ Ասաց՝ մեկ և չորս տարեկան երեխաներին հետո շատ բան կունենան պատմելու հոր մասին, այն, ինչ ասել են նրա զինակից ընկերները․ - «Շրջափակումից հանելով 40-ից ավելի զինվոր, ինքը զոհվել ա հակառակորդի դիպուկահարի հարվածից։ Հերոսաբար ընկել ա։ 30 տարեկան։ Երկու երեխա, կին թողնելով անտեր՝ զոհաբերեց կյանքը հանուն հայրենիքի»։
29-ամյա Հրանտ Հովհաննիսյանի շիրիմին այցելող ընկերները նրան որպես հերոս նկարագրեցի․ - «Ինքը զոհվել ա Մատաղիսի ուղղությամբ, հերոսաբար։ Կարողացել են Արցախի Հանրապետության հյուսիսային ուղղությամբ պահել և թույլ չտալ, որպեսզի հակառակորդը հյուսիսային ուղղությունից ճեղքում կատարի դեպի Ստեփանակերտ։ Ծառայել ենք միասին։ Շատ խիզախ, շատ քաջ, լավագույն ընկերներից մեկը»։
«Նա ամեն ինչով էլ լավն էր։ Լավ որդի, լավ զինվոր, պարտաճանաչ․․․ չեմ կարում խոսամ», - ասում է արտասվող մայրը։
Զինվորական Մանվել Մելոյանը պայմանագրային զինծառայող որդուն է կորցրել։ Պանթեոնում հերթով մոտենում էր բոլոր շիրիմներին։ Ոչ մեկին չեմ կարող առանձնացնել իմ որդուց, բոլորն էլ իմն են, ասաց․ - «Անհավասար մարտի ժամանակ են զոհվել․․․ 23 տարեկան էր։ Պատերազմ էր․․․ պատերազմի ժամանակ մենք գիտակցում ենք, որ զոհեր են լինում, վիրավորներ են լինում։ Այսօր մեր բանակի օրն ա, պարտական ենք մենք կյանքով էս մարդկանց, էս տղերքին, էս երիտասարդներին»։
33-ամյա Արմեն Մարտիրոսյանն իր առաջնեկի ծնվելուց ընդամենը մի քանի օր անց էր գնացել ռազմաճակատ ու զոհվել, պատմեց նրա շիրիմին այցելած բարեկամուհին․ - «Ինքը դիպուկահար էր։ Իրա ընկերները պատմում են իրա մասին, որ ինքը մի այլ ձևի ա կռվելիս եղել թշնամու դեմ։ Դրա նախօրյակին ինքը վիրավոր ա էղել, բայց էլի իրա մեջ ուժ ա գտել, հավաքվել, դուրս եկել էդ բունկերից, տղերքին ասել, որ ես լավ եմ, կարամ կռվեմ, ես պիտի պայքարեմ։ Դուրս ա էկել, կռիվ ա տվել, դրանից հետո պայթել ա․․․»
2020 թվականի արցախյան պատերազմի հետևանքով Լոռու մարզում զոհվել է 162, վիրավորվել 266 զինծառայող։ 57 զինվոր դեռ համարվում է անհետ կորած, երեքը՝ գերեվարվել են։