РASE Rusiyeniñ salâhiyetini tasdıqladı, amma Qırımnıñ işğalini tanımadı –  Ukraina delegatsiyasınıñ başı

Avropa Şurasınıñ Parlament Assambleyası (PACE), ukrain mebusları ve Assambleyanıñ bir çoq azası tarafında temyiz etilgenine baqmadan, Rusiye delegatsiyaınıñ salâhiyetini tasdıqladı. Aynı zamanda  PACE-deki ukrain delegatsiyasınıñ başı Mariya Mezentsevanıñ bildirgenine köre, PACE Qırımnıñ Rusiye tarafından işğal etilmesini tanımağan. 


“Uquq komiteti kollektiv olaraq teklif etti ve zal Rusiyeniñ salâhiyeti tasdıqlansa da, Qırımnıñ işğaliniñ tanımamasını destekledi”, –​ dep yazdı o Facebookta. 


Onıñ malümatına korre, 107 delegat bu qararğa qoltutqan, 36 qarşı çıqqan ve 24 bitaraf qalğan. 


“Rusiyege kene fırsat berdiler, biz ise yazda Rusiye ve biraz soñra Qırım ile bağlı közetüv esabatını bekleymiz ve Assambleyanıñ olğan bütün aletler ile işimizni devam etedejkmiz”,  – dep yazdı Mezentseva. 


O qayd etti ki, Avropa “Rusiyeniñ tecrit olunmasını istemey”, çünki “qafesteki ayvan pek yaramay ve toymağa bilmegen ola”.


“Bizim maqsadımız  – işğalcilerge ve Avropadki aqlarını bozğanlarğa qarşı tazyıqnı toqtatmamaqtır”,  –  dep qayd etti o. 


Hatırlatamız ki, yanvarnıñ 25-nde PACE-deki ukrain delegatsiyası Rusiye delegatsiyasınıñ salâhiyetini temyiz etti.


Avropa Şurası Parlament Assambleyası, Rusiyeni Ukrainanıñ şarqındaki ve işğal etken Qırımdaki areketleri ile bağlı halqara toplulığınıñ talaplırını “deral” yerine ketirmege çağırdı.


2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.


2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.


Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.