АҚШ бомбардимончи самолёти Форс кўрфази узра парвоз қилди
АҚШ ва Эрон муносабатлари кескинлашган бир паллада амалга оширилган мазкур парвоз, АҚШ ҳарбий раҳбариятига кўра, ўзига хос “куч намойиши” бўлган. Бу АҚШ бомбардимончи самолётининг жорий йилда Форс кўрфази узра қилган учинчи, Жо Байден 20 январда АҚШ президенти этиб сайланганидан бери биринчи парвозидир.
АҚШ ҳарбий ҳаво кучлари марказий қўмондонлигининг таъкидлашича, Луизианадаги Барксдейл авиабазасидан учган B-52 Stratofortress бомбардимончи самолёти 27 январь куни Форс кўрфазини айланиб, ўша куниёқ авиабазага қайтган.
“Узоқ масофали, қисқа муддатли ушбу мудофаа миссиясидан мақсад АҚШ дунёнинг исталган бурчагида ҳарбий ҳаво кучларидан фойдалана олиш қобилиятини ҳамда минтақавий хавфсизликка АҚШнинг содиқлигини яна бир бор намойиш қилиш эди", - дейилади қўмондонлик тарқатган расмий хабарда.
Вашингтон ва Теҳрон муносабатларидаги таранглик 2018 йилда президент Дональд Трамп АҚШ дунёнинг етакчи давлатлари билан Эрон ядровий дастури бўйича 2015 йилда эришилган шартномадан чиққанини эълон қилгани ортидан юзага келган эди.
Трамп шундан сўнг Эронга нисбатан санкцияларни жорий этган ва босимни оширган эди. Байден, Теҳрон шартномадаги мажбуриятларга қатъий амал қилишни зиммасига олса, мазкур шартномага АҚШнинг қайтишини билдирган. Эрон эса бунинг эвазига Байдендан санкцияларни бекор қилишни талаб қилмоқда.