Այն դեմոկրատական գործընթացները, որոնց մասին այդքան հայտարարում է Փաշինյանի թիմը, որևէ ներդրում Արևմուտքից չեն բերում. Ստանիսլավ Տարասով
Մոսկվան նորմալ է ընդունել Հայաստանի վարչապետ Նիկոլ Փաշինյանի այցի չեղարկման պատճառը: Tert.am-ի հետ զրույցում նման կարծիք հայտնեց ռուսաստանցի վերուծաբան Ստանիսլավ Տարասովը:
«Ադրբեջանի նախագահն էլ հայտարարել է, որ չի մասնակվելու զորահանդեսին՝ պատճառ բերելով կորոնավիրուսի տարածման պատճառով երկրում ստեղծված իրավիճակը: Մենք երկրներում ունենք մեր դեսպանատերը, որոնք հետևում են այդտեղ տեղի ունեցողին և գիտեն, թե ինչ է կատարվում: Ե՛վ Բաքվում, և՛ Երևանում բարդ իրավիճակ է ստեղծվել: Այդ պայմաններում Մոսկվան այցի չեղարկմանը շատ ադեկվատ է վերաբերում, և չի քաղաքականացում»,- ասաց նա:
Հիշեցնենք, որ չնայած նրան՝ ի սկբանե հայտարարվել էր, որ վարչապետ Նիկոլ Փաշինյանը մասնակցելու է Հայրենական մեծ պատերազմի 75-րդ տարեդարձին նվիրված միջոցառումներին, այնուհետ նամակով Փաշինյանը Ռուսաստանի նախագահին տեղեկացրել էր, որ չեղարկում է իր այցը, քանի որ «գոյություն ունեցող համաճարակային իրավիճակը թույլ չի տալիս իրականացնել այդ ուղևորությունը»:
Անդրադառալով մամուլում հայտնված տեղեկատվությանը, ըստ որի՝ ՀՀ կառավարության ղեկավարի Մոսկվա այցի չեղարկման պատճառն այն է, որ Կրեմլում պահանջել են, որ նա կորոնավիրուսի հայտնաբերման թեստ հանձնի, Ստանիսլավ Տարասովը նշեց, որ այն հավաստի չէ:
«Մենք ոչինչ չենք պահանջել: Մենք նորմալ, բարոյականության վրա հինված հարաբերություններ ունենք: Ես չեմ հավատում, որ պահանջել են Փաշինյանից ինչ-որ հրապարակային ընթացակարգ անցնի»,- ասաց նա:
Տարասովը նշեց, որ որքանով ինքն է տեղյակ, հայրենական պատեազմի տարեդարձին նվիրված միջոցառուներին հրավիրված են 20-30 երկրների ղեկավարներ, ապա նկատեց, որ դժվար է ասել, թե պայմանավորված աշխարհում կորոնավիրուսի տարածմամբ, որոնք ներկա կգտնվեն միջոցառումներին:
«Որքանով տեղյակ եմ՝ Ուզբեկստանի նախագահն էլ հայտարարել է, որ չի կարող գալ՝ նորից երկրում ստեղծված իրավիճակի պատճառով: Դա դեմարշ չէ, պարզապես իրավիճակն է շատ բարդ»,- ասաց նա:
Անդրադառնալով հայ-ռուսական հարաբերությունների ներկայիս մակարդակին, նրան, թե ինչ ազդեցություն ունեն Հայաստանում տեղի ունեցող ներքաղաքական զարգացումները դրանց վրա, ռուսաստանցի քաղաքագետը նշեց, որ չնայած նրան, որ Մոսկվան ուշադիր հետևում է, այնուամենայնիվ, չի պատրաստվում միջամտել դաշնակից երկրի ներքին քաղաքականությանը:
«Այլ հարց է, որ Մոսկվային անհանգստացնում է, որ այդ զարգացումները, որոնք տեղի են ունենում՝ հեղափոխական, ոչ հեղափոխական, պատմության հետ հաշիվներ մաքրել, կրում են մշտական բնույթ»,- ասաց նա՝ միևնույն ժամանակ նշելով, որ իհարկե, Ռուսաստանում նաև հասկանում են, որ Հայաստանը ինքնուրույն սուբյեկտ է, և պետք է ունենա սեփական, անկախ քաղաքականությունը:
Ստանիսլավ Տարասովը նաև նշեց, որ ռուսաստանցի քաղաքագետներն են անհանգիստ Հայատսանում տեղի ունեցողով: «Մենք ցանկանում ենք, որ Հայաստանը պատմության հետ անընդհատ հաշիվներ չմաքրի, այլ իրական բարեփոխումներ անի, առաջ գնա: Մենք տեսնում ենք, որ այն դեմոկրատական գործընթացները, որոնց մասին, այդքան հայտարարում է Փաշինյանի թիմը, որևէ ներդրում Արևմուտքից չի բերում: Իսկ Մոսկվան շատ զգույշ է Հայաստանի հետ հարաբերություններում, հատկապես, երբ հաշվի է առնում, որ երկրում իրավիճակը այնքան էլ լավ չէ. ընդդիմությունը հրաժարական է պահանջում»,- ասաց նա:
Տարասովը նաև նկատեց, որ Ռուսաստանը չի ցանկանում Հայաստանում տեղի ունեցող որևէ գործընթացի միջամտի, քանի որ ամեն ինչ այլ կերպ է հասկացվում:
«Անգամ, երբ Ռուսաստանը ցանկացավ Հայաստանին օգել կորոնավիրուսի դեմ պայքարում, ասացին, որ ցանկանում է Հայաստանը ««օկուպացնի»: Մեզ դա պետք չէ: Կդիմեն մեզ գնության, կօգնենք, չեն դիմի, չենք օգնի»,- ասաց նա:
Հռիփսիմե Հովհաննիսյան