Пікеты і затрыманні ў Менску
Як паведамляе Паваабарончы Цэнтр „Вясна”, супрацоўнікі ў цывільным затрымалі Паўла Севярынца, яго затрымалі каля дома, за палітыкам сачылі ціхары яшчэ з Камароўкі і ў метро.
Таксама затрыманы Вераніка Мішчанка, Вольга Нікалайчык, Алег Баброўскі, Валянцін Фралоў і яшчэ як мінімум 2 чалавекі.
Затрымалі хлопца, што трымаў таблічку з надпісам пра тое, што адбылося ў Беларусі за апошнія 26 гадоў. Да яго падышлі супрацоўнікі і запіхнулі ў звычайную машыну.
* * *
На пляцоўцы каля Камароўскага рынку ў Менска адбываецца буйны збор подпісаў за альтэрнатыўных Аляксандру Лукашэнку кандыдатаў на прэзідэнцкія выбары. Але з самага пачатку мерапрыемства міліцыя пачала чыніць перашкоды зборшчыкам подпісаў за Святлану Ціханоўскую. Была затрымана машына, на якой прывезлі сталы, стэнды, намёты. Затрыманы і яе кіроўца, Алег Баброўскі. Па словах Марыі Мароз – актывісткі ініцыятыўнай групы Святланы Ціханоўскай, гэта грубае парушэнне выбарчага заканадаўства:
– Сёння ў нас затрымалі члена нашай ініцыятыўнай групы. Яго спыніла ДАІ. У ягонай машыне былі намёты, сталы, усё тое, што патрэбнае для пікету. Ён мне патэлефанаваў, што яго спыніла міліцыя, каб я падышла паглядзела. Ён адкрыў акенца і сказаў, што заехаў пад знак. Гэта адміністрацыйнае правапарушэнне. Гэта не падстава, каб затрымліваць чалавека на цэлы дзень, тым больш што ён мусіць выконваць сваю функцыю як член ініцыятыўнай групы – збіраць подпісы.
Міліцыя не толькі затрымала кіроўцу машыны, але і адмовілася аддаць рэчы, неабходныя для збору подпісаў. Але сябры групы здолелі аператыўна арганізавацца, знайсці крэслы і ў нязручных умовах, пад дажджом, пачаць збор подпісаў. Па словах Марыі Мароз, міліцыя відавочна парушыла выбарчае заканадаўста і яе дзеянні будуць абкарджаны у Цэнтрвыбаркам і іншыя ўстановы.
* * *
Каля Камароўскага рынку у Менску збіраюць подпісы за вылучэнне ў прэзідэнты альтэрнатыўных Аляксандру Лукашэнку кандыдатаў. Людзі аддаюць свае подпісы за Віктара Бабарыку, Валера Цапкалу, Андрэя Дзмітрыева, Сяргея Чэрачэня. Аднак найбольш народу стаіць да сябраў ініцыятыўнай групы Святланы Ціханоўскай, чый муж і кіраўнік ініцыятыўнай групы Сяргей Ціханоўскі знаходзіцца за кратамі пасля правакацыі супраць яго, учыненай супрацоўнікамі міліцыі ў Гародні. Як кажуць прыйшоўшыя паставіць подпіс за Святлану Ціханоўскую, гэта і знак падтрымкі, і голас за перамены:
– Падпісваемся, бо ўжо стаміліся ад дадзенай сітуацыі ў краіне. Уладу пара мяняць даўно ўжо.
– Ставім подпісы за Ціханоўскіх. Бо яны падарылі надзею ўсяму народу. Дзякуй ім!
– Галасуем за Ціханоўскую. Стаім дзеля новай улады. Хочам нечага новага ўжо.
– Стаім з адной мэтаю, – каб падпісацца і, канешне, нешта змяніць у гэтай краіне. Таму што гэта ўсё нас усіх вельмі дастала. І, зразумела, што нягледзячы на ўсе правакацыі мы прыходзім і хочам нешта змяніць. Таму і стаім.
Людзей, якія прыйшлі падпісацца на пляцоўку ля Камароўскага рынку было менш, чым у мінулы раз, калі чарга жадаючых паставіць подпіс за Святлану Ціханоўскую расцягнулася больш чым на кіламетр. Тым не менш і зараз людзей вельмі шмат. Людзі сыходзяць, але чарга не змяншаецца, прыходзяць новыя грамадзяне.
* * *
У Менску каля Камароўскага рынку праходзіць збор подпісаў за альтэрнатыўных кандыдатаў у прэзідэнты. Сярод пікетаў ініцыятыўныя групы Цапкалы, Дзмітрыева, Ціханоўскай, Губарэвіча, Бабарыкі, Казлова, Канапацкай, Чэрачаня, Кавальковай.
Як стала вядома Праваабарончаму цэнтру „Вясна”, каля 10.30 гадзін раніцы ў Менску затрыманы Алег Баброўскі – сябра ініцыятыўнай групы Святланы Ціханоўскай.
За адзін квартал каля Камароўкі, на вуліцы Кульман, 1 заўважана некалькі аўтазакаў.
На фота: аўтазакі, міліцыянты і ціхары
Праводзіцца свабодны мікрафон, якім кіруе Павел Севярынец. Людзі часам скандуюць „Свабоду Ціханоўскаму!”, „Свабоду палітвязням!”, „Свабоду Беларусі!, „Стоп таракан”, „Лукашэнка сыходзь!”
Ён прамовіў: „Я за тое, каб не прызываць вялікае начальства нашых сілавых структураў да міласці, а напомніць ім, што гэты пакорны беларускі народ мае кроў сваіх гордых продкаў – ліцвінаў”. Пасля гэтага пачалася нейкая правакацыя. У натоўп прыйшлі міліцыянты, магчыма, спрабавалі нейкага затрымаць. Севярынец заклікаў не паддавацца на правакацыі.
Рэзка падышоў нейкі міліцыянт і шмат ціхароў да выступоўцаў свабоднага мікрафону. Людзі абступілі, пачалі крычаць „Ганьба!” Міліцыянты і ціхары адышлі.
Пасля гэтага свабодны мікрафон працягнуўся, людзі выступаюць.
Як паведамляе „Вясна”, затрыманы сябра ініцыятыўнай групы Вольгі Кавальковай Валянцін Фралоў.
Як паведамляюць незалежныя назіральнікі за мірнымі сходамі #Control.by, на Камароўцы налічылі каля 1350 чалавек.
Людзі скандуюць „Мы народ!”, „Не бойцеся!”.
Севярынец заклікае людзей прыходзіць на пікеты, ставіць свае подпісы. Людзі скандуюць „Беларусь, уставай!”, „Жыве Беларусь!”
Да вольнага мікрафону выйшаў малады хлопец. Пачаў казаць пра тое, як будаваць Беларусь.
А потым сказаў, што хоча будаваць краіну разам з адной дзяўчынай – Веранікай. Ён зрабіў ёй прапанову шлюбу.
„Лукашэнка – не, Ярмошына – не, імперыя – не, Беларусь – так!” – прамаўляе Севярынец, а за ім паўтараюць людзі.
Мужчына прамаўляе ў мікрафон: „Усё, што вы робіце, вам адгукнецца”, – распавядаючы пра супрацоўнікаў органаў, якія затрымліваюць людзей.
Севярынец заклікае падтрымаць палітвязняў, усіх, хто зараз сядзіць на сутках. У тым ліку і паштоўкамі. Ён праскандаваў: „Хопіць карміць рэжым!”
„Аляксандр Рыгорыч, гэта не твая краіна. Гэта наша зямля. І таму мы, як народ, гаворым табе – сыходзь!” – гавораць у вольны мікрафон. Людзі паўтараюць „Лукашэнка, сыходзь!”
Невядомая жанчына прамовіла ў мікрафон: „Я лічу, што Лукашэнку трэба прыцягваць да крымінальнай адказнасці”.
Збіраюць грошы на квіток у Гаагу для Лукашэнкі.
[See image gallery at www.racyja.com]
Таксама выступіў граф Прушынскі.
Беларускае Радыё Рацыя, Менск