Тошкентда Дўстлик-Қўйлиқ ер усти метро линияси қуриб битказилди (ВИДЕО)
Тошкент шаҳар ҳокимлиги Ахборот хизматининг хабар қилишича, янги йўналиш узунлиги 11 километр, метронинг бу участкасида 7 та бекат бор.
Расмий хабарга кўра, бу йўналишда поездларнинг ўртача юриш тезлиги соатига 60 километрни ташкил этади, бекатлар 5 та вагон тўхташи учун мўлжалланган.
"Ҳар бир бекат миллий меъморчилик услубига хос тарзда қурилди, улар кўриниши ва безатилиши жиҳатидан бир-бирини такрорламайди. Метро линияларининг эстакада йўналишида ҳаракатланадиган замонавий ва юқори сифатли, йўловчилар учун барча қулайликларга эга вагонлар келтирилган", дейилади расмий хабарда.
Ўз вақтида тез фурсатларда қурилган ушбу метро линиясининг сифати тармоқларда катта баҳсларга сабаб бўлганди.
“Ўзбекистон темир йўллари” (ЎТЙ) акциядорлик жамияти шу йилнинг 3 февралида ўз расмий сайтида айни линия - “Дўстлик-Қўйлиқ” йўналишидаги ер усти метросининг 6 та бекати қуриб битказилганини маълум қилган.
Расмий хабар билан айни куни Озодликка¸ ”қуриб битказилган участкада катастрофаларга олиб келадиган темир-бетон конструкциялардаги камчиликлар” тасвири деб тақдим этилган суратлар юборилганди.
Суратларда¸ метро поездлари ҳаракатланиши учун қурилган кўприксимон йўлни ушлаб турган устунларга¸ ҳали ишга тушмай туриб дарз кетгани кўрилади.
Ер усти метро лойиҳаси муаллифи бўлган «Боштранслойиҳа» АЖ муҳандиси¸ қурилиш темир-бетон конструкцияларининг хавфли экани ҳақидаги хавотирларни рад қилган.
Ўша кезда «Ўзбекистон темир йўллари» Капитал қуриш бошқармаси бошлиғи ўринбосари Азиз Абдиев маҳаллий матбуотга¸ янги ер усти ҳалқа йўналишининг «Дўстлик-Қўйлиқ» участкасидаги қурилиш ишларига 2000 нафарга яқин мутахассис ва қурувчи, шунингдек 100 дан ортиқ қурилиш ва махсус техника жалб қилинганини айтганди.
Айни пайтда¸ Озодликка ЎТЙга қарашли турли ташкилот ва корхона ишчиларидан келган хабарларга кўра¸ бу йўналишни президентга ваъда қилинган муҳлатда ишга тушириш мақсадида¸ “Ўзбекистон темир йўллари” бошқаруви раиси¸ собиқ Транспорт вазири Очилбой Раматов буйруғи билан 2019 йил ëзидан минглаб ЎТЙ ишчи-хизматчилари қурилишга мажбуран жалб этилган.