Коронавирусга чалинган аёлнинг туғруқ жараёни 7 соат давом этди, соғлом бола туғилди
Соғлиқни сақлаш вазирлигининг маълум қилишича, жигар етишмовчилиги билан оғриган 21 ёшли аёл жорий йил 19 май куни Россия Федерациясининг Санкт-Петербург шаҳридан чартер рейс орқали Тошкентга олиб келинган ва карантинга олинган.
Жорий йил 6 июнь куни ҳомиладор аёлда туғруқ бошланиб, туғруқ жараёни 7 соат давом этди. Туғруқнинг иккинчи даврида аёлда нафас етишмовчилиги, ҳолсизлик, қон босимини кескин кўтарилиши каби белгилар кучайиб, жараён намланган кислород бериш остида олиб борилган.
"Шунга қарамай, тажрибали шифокорларимизнинг саъй-ҳаракатлари натижасида ҳомиладор аёл ўғил фарзандли бўлди. Энг муҳими, туғруқдан кейинги даврда аёлнинг ҳаётига хавф солувчи асоратлар кузатилмади. Янада қувончлиси эса, чақалоқдан коронавирусга олинган таҳлил натижалари ёш мурғакда инфекция йўқлигини кўрсатди", дейилади расмий баёнотда.
2020 йил 7 июнь соат 10:00 ҳолатига кўра, Ўзбекистонда инфекцияга чалинганлар сони 4181, тузалганлар 3 минг 247 киши, 17 бемор вафот этди.