8 июндан яшил ҳудудларда масжидлар очилади, намозхонлардан қоидаларга риоя этиш сўралмоқда
Республиканинг коронавирусга қарши кураш чораларига масъул бўлган Махсус комиссиясининг 4 июнь куни эълон қилинган қарори билан 8 июндан яшил ҳудудларда карантин тадбирлари юмшатилмоқда.
Жумладан, яшил зоналардаги масжидлар учун махсус ишлаб чиқилган санитария ва гигиена қоидаларга риоя қилган ҳолда ибодат қилишга рухсат берилди.
Аввалига “Яшил” ҳудудларда 5 июндан бошлаб масжидлар ва бошқа диний ташкилотлар фаолиятига рухсат берилиши хабар қилинганди.
Аммо, Махсус комиссия 5-8 июнь кунлари диний муассасаларда (масжидлар, черковлар) хавфсизликни таъминлаш учун махсус тайёргарлик чоралари кўрилиши лозимлигини билдирган ва бу санани кечиктирганди.
Республика махсус комиссияси 4 июнь куни тарқатилган изоҳига кўра, мазкур чора-тадбирларга:
- диний ташкилотларга қарашли бино ва ҳудудларни дезинфекция қилиш,
- ижтимоий масофа сақланишини (камида 1,5 -2 метр) таъминлаш учун зарур бўлган махсус белгилар қўйиш,
- масканларни зарур жиҳозлар (пирометрлар, санитария ва дезинфекциялаш воситалари, санитария гиламлари ва бошқалар) билан таъминлаш,
- диний муассасалар ишчилари билан ўқув семинарларини ташкил қилиш.
Ҳозирча аҳоли ўртасида коронавирус инфекцияси тарқалишининг олдини олиш мақсадида оммавий диний тадбирлар (жума намози, якшанба ибодатлари ва бошқалар) ташкил этиш тақиқланганича қолмоқда.