ЧЕТДАН КЕЛАЁТГАНЛАР, «ДАЛЬНОБОЙЩИК»ЛАР КОРОНАВИРУС ТАШИМОҚДА…
Шу ҳақда Санитария-эпидемиология назорати давлат инспекцияси бошлиғи Нурмат Отабеков сўз юритди.
— Биз аниқ биламизки, хориждан уюшган ҳолда олиб келинаётган аҳоли қатламимиз эпидемик нохуш ҳудуддан келяпти. Улар йўл-йўлакай касалликка чалинганлар билан рўбарў келган бўлиши мумкин, учрашган бўлиши мумкин, ёки битта жойда бир муддат бўлган чиқиши мумкин.
Шундай экан, биз бу одамларнинг ҳаммасига потенциал хавф манбайи сифатида қарашимиз керак бўлади. Ҳозирги олиб келинаётган рейсларимизда, баъзи бир рейсни ўзидан 70дан 80 гача ёки ундан ҳам кўп одамларда касаллик борлиги аниқланяпти. Шунинг учун биз уларни карантин зонада ушлаб, тўлиқ ишонч ҳосил қилиб, унда кейин аҳоли орасига қўшиб юборсак, тўғри бўлади. Олисга қатнайдиган юк машиналари ҳайдовчиларига ҳам жуда сергаклик билан ёрдашишимиз керак. Чунки Ўзбекистонда коронавирусга чалинаётганларнинг кўпчилик қисми ўша ҳайдовчиларга тўғри келмоқда.