კულტურული მემკვიდრეობის სააგენტო სოფ. გომანში სომხური ეკლესიის დაზიანებაზე საუბრობს

კულტურული მემკვიდრეობის დაცვის ეროვნული სააგენტოს მიერ გავრცელებული ინფორმაციის თანახმად, დაზიანებულია ახალქალაქში, სოფელ გომანში მდებარე სომხური ეკლესია და მის ეზოში მდებარე საფლავები. ეკლესია კულტურული მემკვიდრეობის ძეგლს წარმოადგენს და სააგენტოს თანამშრომლებმა მის ტერიტორიაზე მძიმე ტექნიკით მუშაობის კვალი იპოვეს, რომლის შედეგადაც დაზიანებული სამარხებიდან ამყრილი ადამიანების ძვლები ეკლესიის გარშემო იყო მიმოფანტული. მომხდარზე დაწყებულია სისხლის სამართლებრივი მოკვლევა.


სააგენტოს მიერ 7 ივნისს გავრცელებული ინფორმაციის თანახმად, კულტურული მემკვიდრეობის დაცვის სააგენტოს ზედამხედველობის სამსახურის ინსპექტირების ჯგუფმა სომხური ეკლესიის ტერიტორიაზე მიწის უკანონო სამუშაოები  4 ივნისს გამოავლინა.




 


„ადგილზე დათვალიერების შედეგად, უკვე დადასტურებულია ეკლესიის სამ (დასავლეთი, სამხრეთი და აღმოსავლეთი) ფასადთან მიწის ფართობზე მძიმე ტექნიკით მუშაობის კვალი, რის გამოც დაზიანებულია ეკლესიის ეზოში მდებარე სამარხები. სპეციალისტების მიერ დაფიქსირებულია სამარხიდან ამოყრილი ადამიანის ძვლები, რომლებიც ტაძრის გარშემოა მიმობნეული. დაზიანებულია ეკლესიის შესასვლელთან არსებული ზღურბლის ქვაც.


პოლიციური მოკვლევის შედეგად, უნდა დადგინდეს კულტურული მემკვიდრეობის ძეგლზე უნებართვო სამუშაოების განმახორციელებელი პირთა ჯგუფი, რომელთაც სამართლებრივი პასუხისმგებლობა განესაზღვრებათ. პარალელურად, სააგენტოს ზედამხედველობის სამსახურის სპეციალისტების მიერ დადგინდება კულტურული მემკვიდრეობის ძეგლის დაზიანებათა ხარისხიც“,- აღნიშნულია კულტურული მემკვიდრეობის დაცვის ეროვნული სააგენტოს ინფორმაციაში.