Rusiye politsiyası, Han sarayını qorçalağan qadın faalni tenbiledi
Vesiqada «cemaat nizamını bozğan» toplaşuv ve mitinglerniñ keçirilüvi yasaqlana, dep aytıla. Qayd etile ki, bunıñ içün para cezası, mecburiy işler ya da 30 künge qadar memuriy apis cezası şeklinde memuriy mesüliyet bar.
«Hadim kelip, özüni memur Taciyev Osman olaraq tanıttı. Hadim qoranta erkânı aqqında soradı. Tenbi vesiqası hususan mayısnıñ 3-ne azırlanılğan «Menlik yürüşi» aktsiyası sebebinden ketirildi, dep qayd etti. Cedvelde mayısnıñ 18-nde – qırımtatar sürgünliginiñ qurbanlarını añma künü keçirilmesi mümkün tedbirler de bar edi. Bu tenbilerni basqı ıntıluvı dep sayam», – dep izaatladı politsiya hadiminiñ yapqanlarını Elmaz Akimova.
2018 senesi fevral ayında qadın faal Bağçasaraydaki Han sarayı ögünde bir kişilik narazılıq aktsiyasını keçirdi. «Han sarayından eliñizni çekiñiz» yazuvlı şiarı bar edi. Daa soñra onı Rusiye politsiyası tuttı.
Bunıñ kibi tenbiler diger qırımtatarlarğa da berildi. Olarnıñ arasında qırımtatar milliy areketiniñ faalleri, aq qorçalayıcılar ve «Qırım birdemliginiñ» jurnalistleri bar.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde kemirilecek edi.
Çubarov, «Qırım yürüşi» arfesinde Kreml qırımtatarlarnı qorquzmağa tırışacaq, dep inkâr etmey.
Martnıñ 31-nde berilgen malümatqa köre, koronavirus sebebinden aktsiya başqa vaqıtqa qaldırıldı.
Rusiye Tış işler nazirligi Qırımtatar Milliy Meclisi ilân etken «Qırım yürüşini» «provokatsiya» dep adlandırdı.