Qırımnıñ tek beş hastahanesi COVID-19 tedaviylevini yapa – Aksenov
«Cumhuriyetniñ dört şeerinde 478 yer azırlanıldı: Kezlev, Kefe, Aqmescit ve Yalta. Bundan ğayrı, Canköy ve Ermeni Bazar şeerlerinde, Aqmescitniñ №2 klinik loqsahanesinde de bu sayıda yer ayırılacaq», – dep aytıla Aksenovnıñ Facebook haberinde.
Onıñ bildirgenine köre, Qırım hastahanelerinde 211 yer oksigennen temin etildi, 93-ünde aqcigerni suniy avalandıruv cihazı bar. Aksenovnıñ qayd etkenine köre, akimiyet daa 240 aqcigerni suniy avalandıruv cihazı içün ariza berdi.
«Yañı Semaşko hastahanesi yedek olaraq bar, anda bütün tehnik teminatı olğan 734 yer ve 79 aqcigerni suniy avalandıruv cihazı mevcut, kerek olsa, olar hastalarğa berilecek. Qayd etmege isteyim ki, bugünki künde Qırımda koronavirus sebebinden aqcigerleri suniy avalandırılğan bir kişi bile yoq», – dep qayd ete Aksenov.
Qırımda keçken künü daa bir koronavirus hastası qayd etildi – Qurman rayonında 11 yaşında bala hastalandı. Qırımnıñ Rusiye Sağlıq nazirliginiñ malümatına köre, umumen Qırımda 46 COVID-19 hastası bar, 23-ü hastahaneden çıqarıldı, 23-ü tedaviylenmege devam ete. Aprelniñ 20-ne qadar Aqyarda 18 koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.