ქობულეთის რამდენიმე ადმინისტრაციულ ერთეულში მკაცრი საკარანტინო შეზღუდვები წესდება
დღეს, მისი თქმით, გვარაში, მუხაესტატეში, ლეღვასა და წყავრუკაში შემოდის სპეციალური რეჟიმი და მკაცრი საკარანტინო შეზღუდვები წესდება.
"გარდა იმ შეზღუდვებისა, რომლებიც დადგენილია საგანგებო მდგომარეობით, ამ ადმინისტრაციულ ერთეულებში აკრძალულია შესვლა და გამოსვლა. ადგილზე ამ რეჟიმის აღსრულებას უზრუნველყოფს შსს-ს და თავდაცვის ძალები.
მოქალაქეებს სახლიდან გარეთ გამოსვლა შეეძლებათ მხოლოდ იმ შემთხვევებში, თუ საჭიროებენ პროდუქტის ან მედიკამენტის შეძენას, ან სამედიცინო მომსახურების მიღებას.
მათ შეეძლებათ სასოფლო-სამეურნეო საქმიანობის გაგრძელება, თუ დაიცავენ პროტოკოლს, რომელიც ასეთი შემთხვევებისთვისაა შექმნილი", - განაცხადა ირაკლი ჩიქოვანმა.
მისი თქმით, ჯანდაცვის სამსახურებმა დაიწყეს ყველა იმ შესაძლო კონტაქტების მოკვლევა, რომლებიც უკავშირდება ე.წ. ქობულეთის კლასტერს. მედიკოსებმა და ეპიდემიოლოგებმა ადგილზე დაიწყეს მოქალაქეების თერმოსკრინინგი, რის შედეგადაც უნდა შემოწმდეს ყველა მოსახლე ამ ადმინისტრაციულ ერთეულში.