Aqmescit akimiyeti suvu azlaşqan yapma gölleri sebebinden suv teminatını sıñırlamaq istey
Bunı fevralniñ 5-inde Aqmescitniñ rusiyeli memuriyetiniñ muşaveresinde haber ettiler.
"Suv teminatı vaqtınca sıñırlanacaq. Cedvelni Aqmescit memuriyetiniñ saytında yerleştirip, matbuatta da tekrarlaycaqmız", - Aqmescitniñ başı Yelena Protsenkoğa atıf etip haber ete "Krım24" telekanalı.
Onıñ aytqanına köre, suv teminatınıñ sıñırlavı çoq qatlı binalar içün de, şahsiy sektor içün de yapılacaq.
"Krıminform" Qırım saytı yazğanı kibi, Protsenko, yarımada quru yılnıñ zirvesinde olağanını ve bu yarımadanıñ eñ keskin meselesi olğanınıqayd etti.
Aqmescit memuriyetiniñ resmiy saytında suv teminatınıñ sıñırlavı aqqında resmiy malümat şimdilik yoq.
Daa evel Rusiye kontrolindeki Qırımnıñ suv hocalığı ve melioratsiya devlet komiteti, yarımada suv anbarlarınıñ üçte biri tolu, dep bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.