Արսեն Բեգլարյանը վերադարձավ Հայաստանի առաջնություն
Հայաստանի ազգային հավաքականի դարպասապահ Արսեն Բեգլարյանը կարիերան կշարունակի «Ուրարտու» ակումբում: Այս մասին հայտնում է ակումբի մամուլի քարտուղարությունը:
26-ամյա դարպասապահը ռուսական «Կրասնոդարի» սան է։ 2012 թվականին տեղափոխվել է Հայաստան։ Բարձրագույն խմբի առաջնությունում նորամուտը նշել է «Գանձասարում»։ Հանդես է եկել նաև «Շիրակ», «Ուլիս», «Միկա», «Ալաշկերտ» ակումբներում։ Խաղացել է նաև լատվիական «Լիեպայում»։ Բեգլարյանի վերջին ակումբը եղել է Բելառուսի բարձրագույն խումբը ներկայացնող Մոգիլևի «Դնեպրը», որի կազմում 26-ամյա դարպասապահն ընթացիկ մրցաշրջանում անցկացրել է 11 հանդիպում։
Բեգլարյանն առաջին անգամ Հայաստանի ազգային հավաքական է հրավիրվել 2013-ին, իսկ 2016-ին առաջին պաշտոնական հանդիպում է անցկացրել Դանիայի հավաքականի հետ խաղում և հետմղել Քրիստիան Էրիկսենի իրացրած 11 մետրանոցը։
«Ամեն ինչ հրաշալի է, արդեն մի քանի մարզում անցկացրել եմ թիմի հետ։ Ճիշտ է, դեռ բոլորի հետ չեմ հասցրել ծանոթանալ, բայց կարծում եմ, որ կիպրոսյան հավաքի ընթացքում այդ բացը կլրացնեմ։
Առաջին օրը ծանոթացել եմ մարզչի հետ։ Ալեքսանդր Գրիգորյանը հայտնի մասնագետ է։ Նրա գլխավորած թիմերի մասնակցությամբ շատ խաղեր եմ նայել։ Ինձ խաղային այդ ոճը դուր է գալիս», – ակումբի մամուլի քարտուղարության հետ զրույցում նշել է 26-ամյա դարպասապահը։
Հավելենք, որ Բեգլարյանը «Ուրարտուում» հանդես կգա 24 համարի ներքո։