Путинни йўқ қилмоқчи бўлган ёқутистонлик шаман Европа судига шикоят қилмоқда…
Ўтган йили Россия президенти Владимир Путинни йўқ қилишга бел боғлаган ёқутистонлик шаман Александр Габышев фуқаролик ҳуқуқлари бузилганини рўкач қилиб Европа судига шикоят аризасини йўллади. Унинг икки ҳамтовоғи Кирилл Мухтарулин ва Алексей Брылевлар ҳам шаман билан бир вақтда Европа судига арз қилган.
Эслатиб ўтамиз, Габышев 2019 йил мартида Москвага пиёда йўл олган. Нияти гўёки Путинни йўқ қилиб, ҳокимиятни халқ қўлига тутқазишдан иборат эди. Бу сафари икки йилга чўзилиши лозим эди. Шаман жами 3 минг километр йўл босиб ҳам қўйганди. 19 сентябр куни кечаси ҳуқуқни муҳофаза қилиш ташкилоти ходимлари Бурятиядаги «Байкал» автомобил йўлида Габышевни қўлга олишди.
Кейинроқ шаманга нисбатан жиноий иш қўзғатилди. Уни халқни экстремизмга даъват қилганликда айблашди. Тергов материалларида айтилганки, шаман 6 мартдан 22 майгача бўлган даврда йўл-йўлакай одамларга мурожаат этиб, барчани экстремистик ҳаракатлар содир этишга чорлайверган.
3 октябрга келиб суд-тиббий экспертиза Габышев руҳан хасталигини кўрсатиб берди. Лекин шаман бу билан ҳам тўхтагани йўқ. 8 декабрда яна пиёда Москвага йўл олди. Аммо 10 декабр куни шаман ва унинг икки ҳамтовоғи қамоққа олинди.