Ўз жонига қасд қилиш - сўнгги чора эмас!

???? Каналга қўшилинг! ????

https://t.me/joinchat/AAAAADwt0NGCRoONT4f1_Q

Юртимиз тинчлиги, халқимиз осойишталигидек азиз неъматларнинг қадрини билган ҳар бир инсон атрофида рўй бераётган ҳолатларга лоқайд бўлмайди. Лоқайдлик эса ҳар доим салбий оқибатларга олиб келган. Бугунги кунда фуқароларимизнинг кутилмаган ҳолатларда тўғри қарор қилиб, тезда тинчлик посбонларига маълумот бериб билдираётган ишончи натижасида бир қанча кўнгилсизликларнинг олди олинмоқда, неча инсоннинг ҳаёти сақланиб қолмоқда. Гоҳида турли вазиятлар сабаб фуқароларимиз, аксар ҳолатларда ёшлар томонидан ножўя ҳаракатлар, кимгадир озор бериш ёки ўз жонига қасд қилиш ҳолатлари учраб туриши ҳеч кимга сир эмас. Шу жумладан, жорий йилнинг 1 ва 3 февраль кунларида Қашқадарё вилояти Қарши шаҳридаги И.Каримов кўчасидан оқиб ўтувчи Қашқадарё дарёсидаги ўз жонига қасд қилиш ҳолатлари ҳам айнан ёшлар томонидан содир этилган. Ҳар икки вазиятда ҳам дарё бўйида жойлашган “Қашқадарё соҳили” сайлгоҳида жамоат тартибини сақлаш ва фуқаролар хавфсизлигини таъминлашга сафарбар этилган Миллий гвардия ҳарбий хизматчилари ва ёшлар келажагига бефарқ бўлмаган фуқароларимизнинг саъй-ҳаракатлари натижасида уларнинг ҳаётлари сақлаб қолинган. Биринчи ҳолатда 1 февраль куни соат 15:10 ларда 2002 йилда туғилган фуқаро С.Р. кўприкдан ўзини ташламоқчи бўлган. Ўқувчи қиз хизмат вазифасини бажараётган Миллий гвардия ҳарбий хизматчилари Д.Жакбаров ва А.Қурбоновлар томонидан ўз вақтида қутқариб қолиниб, РШТЁИМ Қарши филиалига етказилган ва тиббий текширув ўтказилганда, унда ҳеч қандай тан жароҳатлари аниқланмаган. Маълум бўлишича, фуқаро С.Р. оила аъзолари билан ўзаро зиддият туфайли шу ишга қўл урган. Навбатдаги ҳолат эса биринчи вазиятдан кўра аянчлироқ оқибатларга олиб келди. 3 февраль куни тахминан соат 14:50 ларда дарё қирғоғи олдида содир бўлган ўз жонига қасд қилиш ҳолатида 2000 йилда туғилган вақтинча ишсиз фуқаро А.Х. қўлида бўлган шиша синиғини ўзининг бўйин ва қорин соҳаларига санчиб олиб, ўзини дарёга ташлаган. Юз берган воқеани кўрган, 1990 йилда туғилган, Ободонлаштириш бошқармаси ишчиси Ш.Мирзоева дарҳол шу ҳудудда хизмат вазифасини бажараётган Миллий гвардия ҳарбий хизматчилари О.Рахматов ва А.Усмоновларга хабар берган. Ўз ўрнида ҳарбий хизматчилар зудлик билан фуқаро А.Х.ни сувдан қутқариб чиқиб, унга биринчи тиббий ёрдам кўрсатганча, РШТЁИМ Қарши филиалига етказганлар. Тиббиёт ходимлари томонидан фуқаро А.Х га тез-тиббий ёрдам кўрсатилиб, жонлантириш бўлимига ётқизилган. Ҳозирда унинг аҳволи қониқарли даражада. Мазкур ҳолат юзасидан Қарши шаҳар прокуратураси томонидан суриштирув ишлари бошланган. Содир этилган ҳодисаларнинг “қаҳрамонлар”и ёшлар экани одамнинг дилини хира қилади. Хали неча баҳорни қарши олди-ю, ҳаётнинг оғир заҳматини ўз бўйнига олгандек, сўнгги чора сифатида ҳаётдан кўз юмишни афзал кўрдилар? Ёшларни номақбул йўллардан қайтаришда ҳар биримиз маълум даражада ҳисса қўшмоғимиз даркор. Унутманг, ўз жонига қасд қилиш ‒ сўнгги чора эмас!