Ամերիկայի Հայ դատի հանձնախումբն ուսումնասիրում է ամերիկյան դպրոցներում Հայոց ցեղասպանության իրազեկման համար դաշնային ֆինանսավորման վարչական և օրենսդրական հնարավորությունները. ANCA
Ամերիկայի Հայ դատի հանձնախումբը (ANCA) ողջունում է ԱՄՆ Ներկայացուցիչների պալատի կողմից կրթության մասին «Այլևս երբեք» որոշման ընդունումը, որը Սենատի կողմից հաստատման և ԱՄՆ նախագահ Դոնալդ Թրամփի ստորագրումից հետո երկրի Կրթության նախարարությանը հնարավորություն կտա տարեկան 2 միլիոն դոլարի չափով կրթաթոշակ տրամադրել ՝ յուրաքանչյուր հատկացմանը հաջորդող 5 տարիների ընթացքում Հոլոքոսթի վերաբերյալ կրթական աջակցություն տրամադրելու համար:
Ինչպես հաղորդում է Asbarez-ը՝ նախորդ տարի ԱՄՆ Ներկայացուցիչների պալատի և Սենատի կողմից Հայոց ցեղասպանությունը ճանաչող բանաձևի ընդունումից հետո Ամերիկայի Հայ դատի հանձնախումբն այժմ ուսումնասիրում է հասարակության շրջանում Օսմանյան կայսրությունում հայերի, հույների, սիրիացիների, ասորիների և այլ քրիստոնյա ազգերի դեմ կատարած ցեղասպանությունը լուսաբանելու համար դաշնային ֆինանսավորման ինչպես վարչական, այնպես օրենսդրական հնարավորությունները:
«Թուրքիայի կողմից միլիոնավոր քրիստոնյաների ոչնչացումն ու աքսորը դատապարտվել են Կոնգրեսի և ճանաչվել նախկին նախագահների կողմից: Սակայն, դա դեռևս ակտիվորեն ժխտվում է Թուրքիայի կողմից՝ նաև ամերիկյան դպրոցներում և համալսարաններ ներթափանցած թունավոր ստի և կեղծիքների հսկայական արշավի պատճառով»,- ասել է ANCA-ի գործադիր տնօրեն Արամ Համփարյանը և շարունակել. «Մեր դաշնային կառավարությունը պետք է Ամերիկայի դպրոցականներին զինի ճշմարտությամբ՝ որպես մեր երկրի դպրոցներում արտաքին այսպիսի ազդեցության դեմ խոչընդոտ»:
Հիշեցնենք, որ ԱՄՆ Կոնգրեսի վերին պալատը՝ Սենատը, միաձայն ընդունել է Հայոց ցեղասպանությունը ճանաչող բանաձևը՝ մերժելով Թուրքիայի քաղաքականությունը:
Բանաձևը պաշտոնապես մերժում է Թուրքիայի՝ հայերի, հույների, սիրիացիների, ասորիների և այլ քրիստոնյա ազգերի դեմ կատարած ցեղասպանության նկատմամբ ժխտողականությունը:
Հայոց ցեղասպանության մասին երկկուսակցական բանաձևը, մասնավորապես, սահմանում է.
1) ոգեկոչել Հայոց ցեղասպանությունը պաշտոնական ճանաչման և հիշատակման միջոցով,
2) մերժել Հայոց ցեղասպանությունը կամ ցանկացած այլ ցեղասպանություն ժխտելու գործին Միացյալ Նահանգների կառավարությանը ներգրավելու ջանքերը,
3) խրախուսել Հայոց ցեղասպանության վերաբերյալ փաստերի հանրայնացումն ու ուսուցանումը՝ հաշվի առնելով Միացյալ նահանգների դերը մարդասիրական աջակցություն ցույց տալու ջանքերում և Հայոց ցեղասպանության արդիականությունը մարդկության դեմ կատարվող մերօրյա հանցագործությունների համատեքստում:
Բանաձևի նախաձեռնությունը պատկանում է սենատորներ Ռոբերտ Մենենդեսին և Թեդ Քրուզին: Ցեղասպանությունը ճանաչող բանաձևն առաջին անգամ է ընդունվում ԱՄՆ Սենատում:
Նշենք, որ բանաձևն օրենքի պարտադիր ուժ չունի, այն արձանագրում է, որը Միացյալ Նահանգների կառավարությունը պետք է պաշտոնապես ճանաչի և ոգեկոչի Հայոց ցեղասպանությունը, չմասնակցի այդ փաստի ժխտմանը և խրախուսի Հայոց ցեղասպանության հանրային ըմբռնմանը։