Պարո՛ն Փաշինյան, Ձեր ծոծրակը կտեսնեք, բայց երկրից հեռացող Դաշնակցությանը չեք տեսնի, Ձեր թիմի մանկամիտներով կնստեք այդ գնացքը և կգնաք. Արմենուհի Կյուրեղյան (տեսանյութ)
Իշխանությունները ազգակործան քաղաքականություն են վարում, համոզված եմ՝ մեր ժողովուրդը թույլ չի, որ «միամիտ իջևանցին» երկիրը վատ ուղով տանի: Այս մասին Tert.am-ի հետ զրույցում ասաց Հայ Յեղափոխական Դաշնակցության ԳՄ անդամ, ԱԺ նախկին պատգամավոր Արմենուհի Կյուրեղյանը:
Ըստ նրա՝ որևէ ոլորտում զարգացում արձանագրված չէ, վարչապետի խոստումները, հայտարարությունները, այդ թվում Արցախյան հարցի վերաբերյալ հեքիաթի, ֆանտաստիկայի ժանրից են:
Անդրադառնալով Նիկոլ Փաշինյանի՝ իրենց ուղղված հայտարարությանը, թե ՀՅԴ ակտիվիստների գործողությունները հեռացող գնացքի ձայնն են հիշեցնում, Արմենուհի Կյուրեղյանն ասաց.
«Պարո՛ն Փաշինյան, Ձեր ծոծրակը կտեսնեք, բայց մեր երկրից հեռացող Դաշնակցությանը չեք տեսնի, այդ գնացքում տեղը ՀՅԴ-ն տալու է երեխաներին, մանկամիտներին, որոնք հավաքված են ձեր թիմում: Ձեր մանկամիտ, մանկահասակ կուսակցությունով կնստեք այդ գնացք և կգնաք: Լա՛վ իմացեք այդ մասին»,-նշեց նա:
Խոսելով Արցախյան հիմնախնդիրի շուրջ բանակցությունների մասին՝ Արմենուհի Կյուրեղյանն ասաց, որ այդ հարցում հետքայլ ենք գրանցել, ինչի մասին է վկայում նաև Ադրբեջանի կողմից ԵԱՀԿ նախարարների խորհրդին ներկայացրած փաստաթուղթը, որով հիմնախդրի լուծումը դիտարկվում է բացառապես Ադրբեջանի տարածքային ամբողջականության համատեքստում:
«Սա հետքայլ է մինչև 90-ական թվականներ, մինչև Լևոն Տեր-Պետրոսյանի առաջ քաշած փուլային տարբերակով լուծում, ավելորդ անգամ Կառավարության անդամներն ապացուցում են, որ այս մոտեցման կրողն են»,-ընդգծեց նա:
Մանրամասները՝ տեսանյութում։