ზუგდიდისა და ცაიშის ეპარქიაში ბერის, გიგა ქავთარაძის დაკავებას მოულოდნელს უწოდებენ
ზუგდიდისა და ცაიშის ეპარქიის მდივანი, მამა დიმიტრი ვეკუა ამბობს, რომ ბერ გიგა ქავთარაძეს ბავშვობიდან იცნობს და მისი დაკავების ამბავი მოულოდნელი იყო: „ძალიან სამწუხარო ფაქტია... ერთად ვსწავლობდით თბილისის სასულიერო სემინარიაში. შემდეგ ის გაემგზავრა ათონის წმინდა მთაზე და აღიკვეცა ბერად. რამდენიმე წელია ჩვენს ეპერქიაში არ მსახურობს. მე ბრალზე ვერ ვისაუბრებ, ამას გამოძიება დაადგენს, მაგრამ როგორ წარმოგიდგენიათ სასულიერო პირი რანაირად შეიძლება აღმოჩნდეს ამ მდგომარეობაში... მე მას ვიცნობ ბავშვობიდან, მქონდა წლების განმავლობაში მასთან ურთიერთობა და ეს მოულოდნელი ფაქტი იყო“.
მამა დიმიტრი ვეკუას თქმით, ზუგდიდისა და ცაიშის მიტროპოლიტმა გერასიმემ მომხდარი ფაქტი გააცნო ეპარქიის სასულიერო პირებს და ჯერჯერობით მხოლოდ ის ინფორმაცია აქვთ, რაც მედიით გავრცელდა. ეპარქია ოფიციალური განცხადების გამოქვეყნებას აპირებს.
ბერს, გიგა ქავთარაძეს ბრალი ოფიციალურად დღეს, 5 დეკემბერს უნდა წაუყენონ. საქმე ეხება დიდი ოდენობით ნარკოტიკის შეძენა-შენახვას, რომლის გამო უკვე ბრალდებულია ზუგდიდელი რომან მალანია.
სასულიერო პირი პოლიციაში 4 დეკემბერს, ღამით მივიდა და განაცხადა, რომ მალანია არაფერ შუაშია, რადგან ჩანთა, რომელშიც ნარკოტიკი აღმოაჩინეს, მას ეკუთვნოდა.