«Ընկեր-հարևանի հետ կռվելով՝ վարչապետ ընտրեցինք, պարզվեց՝ սա էլ է ոտքերը մեր վրա սրբում ու վսյո». Արծվաշենի բնակիչները պահանջում են խոստացված փոխհատուցումը
Մեր ապրելու պայմանները պետք է աչքով տեսնել ու գնահատել։ Որպեսզի մեր երեխաները դրսում չմնան, տան փոխարեն կացարան ենք առել՝ փլվող, ցեխի կուբիկներով պատած։ Այս մասին այսօր Կառավարության շենքի դիմաց ասաց Գեղարքունիքի մարզի Արծվաշենի նախկին բնակիչներից մեկը։ Արծվաշենցիները պահանջում են խոստացված փոխհատուցումը։
Բնակիչներից Արագած Ջանոյանը նշեց, որ իրենց կորցրած տների փոխհատուցման խնդրի համար եթե ոչ վարչապետի, ապա գոնե փոխվարչապետի հետ են ուզում հանդիպել։ Նրանք անցած տարի ևս հանդիպել են վարչապետին, սակայն, ըստ նրա, ոչինչ չի փոխվել։
«Մենք հանդիպել ենք վարչապետի հետ, ոչ մի բան էլ չի փոխվել։ Ե՛վ նախարարների հետ ենք հանդիպել, և՛ քաղաքապետի, մարզպետի, փոխնախարարի, բոլորն էլ այս պատմությունը գիտեն։ Մենք ուզում ենք այս հարցին կտրուկ որոշում տրվի՝ կա´մ տալիս են փոխհատուցում, կա´մ չեն տալիս»,- ասաց Արագած Ջանոյանը։
Նա ներկայացրեց, որ արդեն 28 տարի է՝ բռնագաղթվել են Արծվաշենից, սակայն որքան էլ դիմել են, ոչ մի փոխհատուցում չեն ստացել։ Նրա խոսքով՝ գործը սառած է, հարցն առաջ չի գնում։
«Եթե մեզ հարգանք չկա, գոնե մեր զինվորին հարգեն։ Մի գիշերվա մեջ Լևոն Տեր-Պետրոսյանը չգիտեմ ում հետ է խորհրդակցել, Արծվաշենը փոխանակել է։ Մենք մինչև հիմա չգիտենք՝ ով ենք։ Թե ինչ կա այս թաքնված գաղտնիքի տակ, չեն ուզում բացել»,- ասաց բնակիչներից մյուսը։
«Մեզ խփելով, ընկեր-հարևանի հետ կռվելով, վարչապետ ընտրեցինք։ Բանից պարզվեց՝ սա էլ է ոտքերը մեր վրա սրբում ու վսյո․ Արծվաշենը չկա, չի եղել, արծվաշենցիք մարդ չեն, կենցաղը կարգավորելու, բաղնիք, խոհանոց սարքելու հնարավորություն չունենք»,- ասաց արծվաշենցին։
Նա նշեց, որ վերջերս Աննա Հակոբյանը գնացել է իրենց մոտ, դիմավորել են, սակայն երբ խնդրել են մի քանի տուն նայել, նրա խոսքով՝ չբարեհաճեց, քանի որ իրենք պետք են միայն ընտրությունների ժամանակ։
Մենք ուրիշ ժամանակ պետք չենք, մենք պետք ենք, որ մեր երեխեն գնա ծառայի, զոհվի։ Գոնե զինվորի նկատմամբ հարգանք ունենան․ մեր հաշմանդամը հաշմանդամ չի, մեր զինվորը զինվոր չի»,- ասաց նա և հավելեց, որ միշտ Հայաստանի կողքին են եղել, բայց, փաստորեն, հիմա, ըստ նրա, ճիշտը ուրիշ երկիր գնալն էր։
Հիշեցնենք, որ Կառավարության դիմաց բողոքի ակցիա են անում Արծվաշենի նախկին բնակիչները։ Նրանք պահանջում են Կառավարության կողմից խոստացված փոխհատուցումը։
Նշենք, որ 2009 թվականին Կառավարության որոշում է եղել արծվաշենցիների կորուստները փոխհատուցելու՝ 6 մլրդ դրամ հատկացնելու վերաբերյալ։