Եթե ունենալու ենք 2-3 համայնք և մեկ մարզպետ, իմ համոզմամբ՝ մարզպետական ինստիտուտները պետք է վերանան. Միքայել Մելքումյանը՝ համայնքների խոշորացման մասին
Քանի որ նախորդ փուլերում համայնքների խոշորացումը խիստ քննադատվել էր, որևէ մեկը չասաց, թե խոշորացման արդյունքում ի՞նչ շահեկան վիճակ է ստեղծվել, կամ ստեղծվե՞լ է, թե ոչ: Այս մասին Ազգային ժողովում «Տեղական հանրաքվեի մասին» օրենքում լրացումներ և փոփոխություններ կատարելու մասին հարցի քննարկման ժամանակ հայտարարեց ԱԺ «Բարգավաճ Հայաստան» խմբակցության պատգամավոր Միքայել Մելքումյանը:
Պատգամավորը նկատեց, թե միայն ասվել է, որ այս համայնքում ջրագիծ է կառուցվել, այն մեկում մանկապարտեզ, ապա հավելեց, որ շատ բաներ էլ չեն կառուցվել: «Այսինքն՝ այդ խոշորացումը կապ ունե՞ր այդ կառուցումների հետ, թե՞ կապ չուներ, մինչև խոշորացումն էլ այնպես չէ, որ համայնքներում ոչինչ չի կառուցվել: Հիմա ուղղակի ցանկանում եմ հասկանալ այդ խոշորացման բարերար ազդեցությունը: Ես կխնդրեի ներկայացնել, ինչ ուղղությամբ ենք մենք գնում, միգուցե պրոբլեմ կա, միգուցե այդ խոշորացումը շատ ավելի արագացնելու խնդիր կա, կամ միգուցե չանենք»,- ասաց նա:
Միքայել Մելքումյանը նաև խնդրեց ներկայացնել տվյալներ: Նրա խոսքով՝ քանի որ մինչև այս էլ որոշ համայնքներում եղել են հանրաքվեներ՝ Դիլիջանում, Թումանյանում և այլն, պետք է այդ հանրաքվեների արդյունքները հասկանալ՝ քանի՞ փոքր համայնք է դեմ եղել և այդ դեմ լինելը որևէ նշանակություն ունեցե՞լ է, թե չի ունեցել:
«Նաև պետք է հասկանալ մասնակցությունը ընտրություններին կապ ունի՞, թե չունի: Ասենք մի երկու համայնք բոյկոտում են, ընդհանրապես այդ իրավիճակը քննարկվել է: Կամ մասնակցության տոկոսի մասին հարց քննարկվե՞լ է, թե ոչ, թե ասենք 25 տոկոսը մասնակցել է և համարենք, որ կայացել է, սրանք կարևորագույն հարցեր են»,- ասաց նա:
Վերջում Միքայել Մելքումյանը հարց բարձրացրեց և նշեց, որ առաջիկայում դրա մասին անընդհատ բարձրաձայնելու է: «Եթե 2-3 համայնք՝ մեկ մարզպետ, դա նորմա՞լ է լինելու, թե այս պահից սկսենք մարզպետական ինստիտուտների բարեփոխման խնդիրը, իմ համոզմամբ արդեն այդ մարզպետական ինստիտուտները պետք է վերանան»,- եզրափակեց նա: