Տիտղոսների ստուգաբանությամբ մտահոգ անձանց հորդորում եմ ֆիքսել՝ ՀՀ է ժամանել ԱՄԷ-ի նախագահի որդին, իսկ այցն ունեցել է բիզնես նպատակ․ Ի. Տոնոյանը՝ ԱՄԷ դեսպանության պարզաբանման մասին
Արաբական Միացյալ Էմիրությունների դեսպանատունը փարատել է որոշ մարդկանց այն կասկածները, թե Հայաստան ժամանածները շեյխեր չեն եղել: Tert.am–ի հետ զրույցում, անդրադառնալով ՀՀ–ում ԱՄԷ դեսպանության տարածած հաղորդագրությանը, այս մասին ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը։
Հիշեցնենք, որ երեկ ՀՀ-ում ԱՄԷ դեսպանությունը պարզաբանում էր տարածել ԲՀԿ նախագահ Գագիկ Ծառուկյանի այն հայտարարության մասին, թե հեղափոխությունից հետո իր հրավերով Հայաստան են եկել Աբու Դաբիի թագաժառանգն ու Արաբական Միացյալ Էմիրությունների «Ռոտանա» հյուրանոցային ցանցի սեփականատերը, որոնք ցանկություն են հայտնել Հայաստանում ներդրումներ կատարել, սակայն Երևանի քաղաքապետի ու Երևանի գլխավոր ճարտարապետի հետ հանդիպումը հաջող չի անցել: Դեսպանության պարզաբանման մեջ նշված էր՝ Աբու Դաբիի թագաժառանգ, ԱՄԷ զինված ուժերի գլխավոր հրամանատարի տեղակալ շեյխ Մուհամմադ բին Զայեդ Ալ Նահյանը երբևէ չի այցելել Հայաստան։
«ԱՄԷ դեսպանությունից «Տեղեկատվության ստուգման կենտրոնին» հայտնել են, որ 2019 թվականին Հայաստան է ժամանել ԱՄԷ-ի նախագահի որդին` շեյխ Սուլթան բին Խալիֆա Ալ-Նահյանը: Դեսպանատունը հաստատել է, որ նախագահի որդին Հայաստան եկել է բիզնես այցով։ Իսկ թագավորական ընտանիքի անդամների տիտղոսների ստուգաբանությամբ մտահոգ բոլոր անձանց հորդորում եմ գոնե հիմա ֆիքսել, որ Հայաստան է ժամանել ԱՄԷ-ի նախագահի որդին` շեյխ Սուլթան բին Խալիֆա Ալ-Նահյանը, և այցն ունեցել է բիզնես նպատակ»,–նշեց Իվետա Տոնոյանը՝ հույս հայտնելով, որ այսքանով թեման փակված կհամարվի։