Այսօր ժողովուրդն ունի բանակցությունների մասին ճշգրիտ, կոնկրետ տեղեկատվություն ստանալու արդարացված պահանջ. փորձագետ
Բրատիսլավայում երեկ տեղի ունեցած հանդիպման վերաբերյալ Հայաստանի և Ադրբեջանի արտգործնախարարությունների տարածած հաղորդագրությունները բազմապատկում են այն մտահոգությունները, որ ունեինք բանակցությունների հետ կապված: Այս մասին Tert.am-ի հետ զրույցում նշեց «Հայացք» վերլուծական կենտրոնի փորձագետ Հերմինե Մխիթարյանը՝ անդրադառնալով երեկ Բրատիսլավայում տեղի ունեցած ՀՀ և Ադրբեջանի ԱԳ նախարարների հանդիպմանը:
«Նախարարների հանդիպմանը նախորդած իրադարձություններն իրենց սրությամբ բավական լարված ֆոն էին ստեղծել: Հատկապես հանդիպումից ժամեր առաջ ԵԱՀԿ-ում ադրբեջանական կողմի տարածած փաստաթուղթը, ըստ էության, ոչ այլ ինչ էր, եթե ոչ վերջնագիր. Ադրբեջանը պատրաստ է բանակցել բացառապես իր կողմից նշված հայեցակարգի ու տրամաբանության շրջանակներում»,- նշեց փորձագետը՝ հավելելով, որ նման իրավիճակում առավել քան կարևոր էր հայկական կողմի, անգամ՝ կողմերի ադեկվատ ու հստակ արձագանքը:
«Մինչև հանդիպումը Հայաստանից ու Արցախից չունեցանք որևէ արձագանք այս փաստաթղթին, ավելին՝ նույն օրը ՀՀ ԱԺ-ում հարցուպատասխանի ժամանակ դրան անդրադառնալու իրական հնարավորություն ուներ նաև վարչապետը՝ Նիկոլ Փաշինյանը, ով նախընտրեց հերթական անգամ խոսել Հայաստանի ու Արցախի մոտեցումները հարյուր տոկոսով նույնական լինելու՝ մեզ համար ոչ այնքան շահեկան թեզի մասին», - նշեց Մխիթարյանը՝ հավելելով, որ փաստաթղթին կարող էր անդրադառնալ նաև ԱԳ նախարարը՝ հենց Բրատիսլավայում, բայց այդպես էլ որևէ ձևով ու որևէ մակարդակով անդրադարձ չունեցանք:
Փորձագետի կարծիքով՝ արդեն նախարարների հանդիպումից հետո Հայաստանի և Ադրբեջանի արտգործնախարարությունների տարածած հաղորդագրությունները բազմապատկում են այն մտահոգությունները, որ ունեինք բանակցությունների հետ կապված. «Ադրբեջանական վերջնագիրն անպատասխան թողնելով բանակցելը, դեռ ավելին՝ պայմանավորվելը եկող տարվա սկզբին նորից հանդիպել, խոսում է այն մասին, որ սեղանին դրված «միասնական փաթեթը», որի մասին դեռ օրեր առաջ խոսում էր նախարար Մնացականյանը, հեռու է հայկական շահերը արտացոլելուց, եթե չասենք՝ ռեալ վտանգ է հայկական կողմի համար»:
«Վարչապետ Փաշինյանը մեկ անգամ չէ, որ նշել է, թե չի պատրաստվում Արցախի վերաբերյալ բանակցությունները գաղտնիության քողի ներքո պահել: Վարչապետը բազմիցս հավաստիացրել է, որ ցանկացած պարագայում, եթե սեղանին լինի փաթեթ, որի շուրջ ինքը պատրաստ կլինի բանակցել, կներկայացնի նաև ժողովրդին: Այսօր, ըստ էության, արդեն բովանդակային բանակցությունների փուլում ենք, և ժողովուրդն ունի դրանց մասին ճշգրիտ, կոնկրետ տեղեկատվություն ստանալու արդարացված պահանջ», - ամփոփեց փորձագետը: