Мамлакатда бизнес муҳитини янада яхшилаш ва тадбиркорликни қўллаб-қувватлаш тизимини такомиллаштириш борасидаги янги чора-тадбирлар
2020 йил 1 февралдан бошлаб: экспорт-импорт операцияларини амалга оширишда талаб этиладиган рухсат этиш хусусиятига эга ҳужжатлар ва сертификатлар «Ягона дарча» божхона ахборот тизими орқали расмийлаштирилиши ҳамда бунда ваколатли органларнинг автоматлаштирилган ахборот тизимлари «Ягона дарча» божхона ахборот тизимига интеграция қилиниши назарда тутилмоқда.
2020 йил 1 октябрдан бошлаб эса қуввати 140 киловаттгача бўлган электр ускуналарини электр тармоқларига улаш жараёнида сарфланадиган харажатлар тадбиркорлик субъектининг хоҳишига кўра, давлат хизматлари марказларига техник шартларни олиш учун мурожаат қилиш билан бир вақтда берилган сўровномасига асосан «Ҳудудий электр тармоқлари» акциядорлик жамияти маблағлари ҳисобидан амалга оширилади. Мазкур маблағлар тадбиркорлик субъектлари фойдаланган электр энергияси қийматига қўшиладиган устамалар ҳисобидан бир йил давомида ундириб олиниши белгилаб берилди.
Бундан ташқари, 2020 йил 1 январдан қуйидаги талаблар бекор қилинмоқда:
Биринчидан, тадбиркорлик субъектлари — юридик шахслар ўртасидаги кўчмас мулк олди-сотди шартномаларини тарафлардан бирининг талаби бўйича нотариал тасдиқланганда коммунал хизматлар бўйича қарздорликларни текшириб олиш;
Иккинчидан, давлат солиқ хизмати органларига солиқ тўловчилар томонидан кўчмас мулкка бўлган ҳуқуқ давлат рўйхатидан ўтказилгандан сўнг аризани ҳамда кўчмас мулкка бўлган ҳуқуқни давлат рўйхатидан ўтказувчи органлар томонидан тегишли ҳудудда жойлашган ер участкаси ва бошқа кўчмас мулк, унинг мулкдорлари тўғрисидаги маълумотни бевосита қоғоз кўринишда тақдим этиш;
Учинчидан, мева-сабзавот ва тўқимачилик маҳсулотлари ва буюмларини экспорт қилиш (пахтадан ташқари) учун зарур рухсатнома ва сертификатларни расмийлаштиришда тадбиркорлик субъектларидан тўлов ундириш талаблари бекор қилинмоқда.
Шунингдек, мазкур қарор низони судгача ҳал қилиш усулларидан бири сифатида юбориладиган талабномани кўриб чиқиш муддатини 15 кун қилиб белгилаш, суд иш юритувига ахборот технологияларини янада кенг жорий этиш чораларини кўриш, шу жумладан юридик шахслар томонидан даъво аризаси ва унинг иловаларини жавобгар ҳамда судга солиқ тўловчининг шахсий кабинети орқали электрон тарзда юбориш имкониятини яратиш, «Судлар тўғрисида»ги Қонунга суд раислари ваколатидан ишларни тақсимлаш билан боғлиқ нормаларни чиқариб, ишларни судьяларга фақат автоматик равишда тақсимланишини белгиловчи ўзгартиришларни киритиш, тарафлар учун суд иш юритувида бўлган ҳар бир ишни масофадан туриб мониторинг қилиш имконини яратиш, суд ҳужжатларини судлар фаолиятига жорий этилган ахборот тизими орқали автоматик равишда шакллантириш ҳамда расмий веб-сайтда шахссизлантирмаган ҳолда чоп этилишини таъминлаш каби мухим масалаларни ўз ичига олган.
Ўрта Чирчиқ туманлараро иқтисодий суди
раиси Т.А.Аннаева
Ўрта Чирчиқ туманлараро иқтисодий суди
судьяси Х.Н.Равшанов