Համացանցում են հայտնվել «Հավերժները» ֆիլմի նկարահանման հրապարակից Անջելինա Ջոլիի առաջին լուսանկարները (լուսանկարներ)
Համացանցում են հայտնվել Marvel կինոստուդիայի «Հավերժները» ֆիլմի նկարահանման հրապարակից Անջելինա Ջոլիի առաջին լուսանկարները, որոնք հրապարակել է Daily Mail պարբերականը։
Թեև լուսանկարներն արվել են զգալի հեռավորությունից, դրանցում երևում է, որ «Հավերժները» ֆիլմում Թենայի դերը մարմնավորող 44-ամյա դերասանուհին կրում է ոսկեգույն հանդերձ և շեկ կեղծամ։
Ջոլիի հետ նկարահանման հրապարակում են գտնվել նաև Ջեմա Չանը և Ռիչարդ Մեդենը։
Անջելինա Ջոլին Marvel-ի «Հավերժները» ֆիլմում մարմնավորելու է Թենային, Ռիչարդ Մեդենը՝ Իկարիսին, Սալմա Հայեքը՝ Աջաքին, Քումեիլ Նանջիանին՝ Քինգոյին:
Նշենք, որ հենց այս ֆիլմի շրջանակում էլ Անջելինա Ջոլին, Սալմա Հայեքն ու Ռիչարդ Մեդենը միացել են Marvel-ի սուպերհերոսների մեծ ընտանիքին:
Ավելի վաղ հաղորդվել էր, որ Հոլիվուդյան դերասաններ Անջելինա Ջոլիին և Ռիչարդ Մեդենին տարհանել են «Հավերժները» (The Eternals) ֆիլմի նկարահանման հրապարակից՝ տարածքում չպայթած ռումբ հայտնաբերելուց հետո։
Ըստ հաղորդման՝ Կանարյան արշիպելագի Ֆուերտեվենտուրա կղզու տարածքում ստիպված են եղել տարհանում իրականացնել, որպեսզի ռումբերի վնասազերծման մասնագետներին թույլ տան վնասազերծել սարքը, որը, ինչպես կարծում են, տարածքում է մնացել Երկրորդ համաշխարհային պատերազմի նացիստական բազայից: