Генадзь Фядыніч: Ідэя не горшая, але і не новая

Адзін з лідараў прафсаюза РЭП Генадзь Фядыніч ацаніў ініцыятыву айчынных блогераў.

Нагадаем, што айчынныя блогеры запрасілі беларусаў сустрэцца 8 лістапада на плошчы Свабоды ў Менску, падчас сустрэчы кандыдатаў у дэпутаты з выбарцамі, каб абмеркаваць, што рабіць далей і куды павінна рухацца краіна, зазначае тэлеграм-канал «NEXTA».

Генадзь Фядыніч: Наколькі вядома, сам блогер НЕХТА, які падаў такую ініцыятыву, знаходзіцца за мяжой і ўдзельнічаць у акцыі не збіраецца. Магчыма, ён разлічвае, што адгукнецца моладзь, але што далей? Прыйдуць людзі на пікет кандыдатаў, і якія далейшыя дзеянні? Будзе ісці нейкае дыстанцыйнае абмеркаванне?

Калі сур’ёзна арганізоўваць акцыю, то найперш трэба знаходзіцца ў Беларусі, на месцы падзей. Асноўная праца павінна рабіцца ў Беларусі і беларусамі, якія тут жывуць. Вось што трэба зразумець.

РР: Але як вам ідэя выкарыстоўваць пікеты кандыдатаў для сустрэч і абмеркавання нейкіх надзённых праблем?

Генадзь Фядыніч: Ідэя не самая горшая, але яна і не новая. У нас жа ў людзей няма абсалютна ніякага права на мірныя сходы, таму многія і вырашылі выкарыстаць час парламенцкай кампаніі для таго, каб праводзіць легальныя пікеты і даводзіць да людзей тое, што ў звычайны час забаронена рабіць.

Пабачым, што дасць такая ініцыятыва, і ці гатовы сёння людзі адгукацца на заклікі блогераў.

Кастусь Заблоцкі, Беларускае Радыё Рацыя