Մեզ համար անընդունելի է Մայր Աթոռի վեհարանը գրավելու, դատարանները շրջափակելու դաստիարակությունը. Տարոն Տոնոյան
Այս ասուլիսը միայն երեկվա ԿԳՄՍ նախարարի արված հայտարարություններին պատասխան տալու համար չէ, քանի որ երեկ տեղի ունեցածը վերջին մեկուկես տարվա երևույթների արտացոլումն էր: Այս մասին ասաց ՀՅԴ Հայաստանի ԳՄ անդամ, բժիշկ Տարոն Տոնոյանը:
«Մեզ համար՝ որպես Դաշնակցություն, չափազանց անհանգստացնող է այն քաղաքականությունը, որը վարվում է մշակույթի, կրթության և գիտության բնագավառում: Մեզ անհանգստացնում է այն ընդգծված քաղաքականությունը, որը մեր հասարակությանը տանում է ապազգայանացման: Սա մենք որակում ենք որպես ծրագրավորված քաղաքականություն, որի արդյունքը պետք է լինի ստանալ ապազգային ՀՀ քաղաքացի, որի համար խաղաղությունը ցանկացած տարբերակով ընդունելի է»,- ասաց նա և նշեց, որ իրենց դա է վախեցնում:
Նրա խոսքով՝ դա արժեհամակարգ թելադրելու, մտածված, ծրագրավորված քաղաքականություն է, որը վարվում է մասնավորապես ԿԳՄՍ նախարարի և Կառավարության կողմից: «Քաղաքական ուժ, որը Երևանի ավագանու ընտրություններում՝ 80 տոկոս, իսկ Աժ ընտրություններում՝ 70 տոկոս քվե ստացավ, պետք է կարողանար օգտագործել այդ հոյակապ ռեսուրսը՝ իրականություն դարձնելու խոստումները, որ արվեցին մարդկանց միավորելու համար, բայց առաջին բաժանարար գծողները հենց իշխանությունները դարձան: 70 տոկոս ստացած ուժը չպետք է բաժանարար գծեր անցկացնի»,- ասաց նա:
Նա նշեց, որ եթե Դաշնակցությանը քննադատում են զուտ քննադատելու համար, ապա իրենց քննադատությունը միշտ եղել է պետության համար, և իրենք երբեք բամբասանքների մակարդակի չեն իջել: «Ինչ վերաբերում է պարոն նախարարի դաստիարակությանը, ով, ի դեպ, մեր երիտասարդներին և ողջ հայաստանյան ՀՅԴ կառույցին անվանեց անդաստիարակ, պետք է ասեմ, որ մեր դաստիարակությունը հետևյալն է՝ Դաշնակցությունը՝ որպես ընտանիք, մեզ դաստիարակել է սիրել ընկերոջը, մերձավորին, հայրենիքը, սիրել ոչ միայն լեզվով ու խոսքով, այլ՝ սրտով ու գործով: Մեր դաստիարակությունն այն է, որ այսօր նստացույց անող երիտասարդներն ապրիլյան պատերազմի ժամանակ առաջին իսկ արձագանքողներն են եղել, Թալիշի առաջին գծերում են եղել: Սա է մեր դաստիարակությունը: Մեզ համար անընդունելի է այն դաստիարակությունը, որ պետք է Մայր Աթոռի վեհարանը գրավեն, դատարաններ շրջափակեն»,- նշեց նա: