Фаъоли қазоқистонӣ Алибек Молдин 15 рӯз ҳабс шуд

Додгоҳи шаҳри Оқтеппаи Қазоқистон рӯзи 7 ноябр фаъоли ҷамъиятӣ Алибек Молдинро ҳабси маъмурӣ кард. Додгоҳ ӯро панҷ рӯз барои иштирок дар гирдиҳамоии зиддичинӣ дар оғози моҳи сентябр ва 10 рӯзи дигар "барои итоат накардан ба талаботи пулис" зиндонӣ кард.


Ба иттилои тафтишот, фаъоли ҷамъиятӣ рӯзи 3 сентябр дар шаҳри Оқтеппа бо навиштаҷоти "Нест бод густариши Чин" назди бинои ҳукумат ҳозир шуда, ҳамчунин шиор додааст: "Қазоқҳо, бедор шавед". Ба гуфтаи додгоҳ, Молдин 7 ноябр талаби қонунии кормандони пулисро иҷро накардааст.


Жадир Нугманова, ҳамсари Молдин мегӯяд, кормандони пулис ӯро субҳи рӯзи панҷшанбе, замоне боздошт карданд, ки духтарашро ба мактаб мебурд.


"Чаҳор кас ба шавҳари ман ҳамла карданд ва ӯро иҷборан ба мошин шинонданд. Дар оғоз мо дар ин бора иттилоъ надоштем. Баъди чанде ман ба мактаб рафтам, ба бемористонҳо ва пулис тамос гирифтам. Дар идораи пулис ба ман гуфтанд, ки шавҳарам дар идораи онҳост ва ба додгоҳ бурда мешавад. Тамоми рӯз дар додгоҳ будам ва танҳо шом соати 8 ба хона омадам. Ин ки мегӯянд, ба талаби пулис итоат накардааст, дурӯғи маҳз аст",-гуфт Жадир Нугманова.


Ҳафтаи гузашта хабар расид, ки нисбати Алибек Молдин бо моддаи "Таҳқир" парвандаи ҷиноӣ боз шудааст.


Дар додгоҳ маълум шуд, ки гуруҳе аз модарони серфарзанд нисбати Молдин шикоят кардаанд. Жанар Кулмамбетова, яке аз занони ҷабрдида дар парвандаи Молдин мегӯяд, вай тавассути шабакаҳои иҷтимоӣ модарони серфарзандро таҳқир кардааст. Аммо ҷонибдорони Молдин мегӯянд, ин парванда фармоишӣ аст.


Алибек Молдин давоми ним соли охир се маротиба ба ҳабси маъмурӣ маҳкум шуд. Вай ин ҳабсҳоро сиёсӣ меномад.