Մեր համոզմամբ` Դատախազությունն անհարգալից վերաբերմունք է ցուցաբերում դատավոր Աննա Դանիբեկյանի նկատմամբ. Ռոբերտ Քոչարյանի փաստաբան
Դատարանը բազմիցս արձանագրել է, որ ՀՀ երկրորդ նախագահ Ռոբերտ Քոչարյանի՝ քննությունից խուսափելու հիմքեր չկան, դատավոր Աննա Դանիբեկյանը ևս հաստատել է, որ այդ հիմքը բացակայում է:
Այս մասին լրագրողների հետ հանդիպմանը հայտարարեց ՀՀ երկրորդ նախագահ Ռոբերտ Քոչարյանի փաստաբան Հովհաննես Խուդոյանը` նշելով, որ դատական վերջին նիստերին հիմնականում քննարկվում է Քոչարյանի խափանման միջոցի փոփոխման հարցը, որը գուցե էտապներով նույնական է թվում, բայց բովանդակային առումով տարբերություններ կան:
«Սեպտեմբերի 20-ին դատարանը, քննարկելով գրավի միջնորդությունը, նշել էր, որ Դատախազության այն պնդումները, որ Ռոբերտ Քոչարյանը կարող է խուսափել քննությունից, չի հաստատվում, բայց անկախ նրանից, որ կան մի շարք դատական ակտեր, և այս դատական նիստում ևս հայտարարվել է խուսափելու հիմքի բացակայության մասին, Դատախազության մեր գործընկերները, չգիտես ինչու, պնդում են, թե այդ հիմքն առկա է: Դատական պրոցեսում չենք ցանկանում դրա մասին բարձրաձայնել, բայց, մեր համոզմամբ, դա ինչ-որ իմաստով, նաև անհարգալից վերաբերմունք է դատավորի նկատմամբ, որովհետև մենք, համաձայն չլինելով դատավոր Աննա Դանիբեկյանի որոշման հետ, ամեն դեպքում դա վիճարկման առարկա չենք դարձնում»,-ասաց փաստաբանը:
Նրա պնդմամբ` դատարանը չունի հիմքեր` գրավի միջնորդությունը չընդունելու համար: Թեև ներպետական օրենքները, մասնավորապես, Քրեական դատավարության օրենսգիրքը սահմանում է, որ գրավը կիրառվում է ոչ մեծ և միջին ծանրության հանցագործությունների համար, բայց կա Եվրոպական կոնվենցիա, որն այդ հնարավորությունը տալիս է:
«Երկրի ներքին օրենսդրությունը չպետք է որևէ արգելք սահմանի գրավի կիրառման համար: Օրենքը, որով գրավը կիրառվում է միայն է ոչ մեծ և միջին ծանրության հանցագործությունների համար, կա, գործում է տասնամյակներ, բայց չի կիրառվում, որովհետև դա ուղղակիորեն հակասում է Եվրոպական դատարանի պրակտիկային, գրավը կիրառվում է նաև ծանր և առանձնապես ծանր հանցագործությունների դեպքում, ինչն ուղղակի հակասում է օրենքին, բայց առաջնահերթ է ոչ թե օրենքը, այլ մարդու իրավունքը, նաև Եվրոպական կոնվենցիայի հոդվածներին համապատասխանելու անհրաժեշտությունը»,-ասաց խուդոյանը` ընդգծելով, որ փաստաբանների կողմից հարգված շատ դատավորներ կիրառում են հենց Եվրոպական դատարանի այդ պրակտիկան:
«Երբ մեր գործով համանման պայմաններում նշվում է, որ գրավը չի կարող կիրառվել, մենք այստեղ տեսնում ենք երկակի ստանդարտ և կանխակալ վերաբերմունք։ Բայց, ամեն դեպքում, առաջնորդվում ենք դատարանի որոշմամբ», - նշեց Խուդոյանը։
Հիշեցնենք`երեկ Երևանի ընդհանուր իրավասության դատարանում դատավոր Աննա Դանիբեկյանը մերժեց Քոչարյանի փաստաբանների` ՀՀ երկրորդ նախագահ Ռոբերտ Քոչարյանի խափանման միջոց կալանքը գրավի դիմաց փոխելու միջնորդությունը: